Quarterfinal-ah PV Sindhu

Champion lai PV Sindhu chuan BWF World Championships khelh laiah quarterfinal a inhlangkai. Nimina last 16 inkhelah Indian star hian Pornpawee Chochuwong chu minute 48 chhungin 21-14, 21-18 in a hneh.

World number 7 Sindhu hi round hmasa berah a bye a, a match hmasa zawkah Martina Repiska chu 21-7, 21-9 in a lo hneh tawh. Semifinal thleng tur chuan Tai Tzu Ying a paltlang leh a ngai dawn.

Last 16 inkhel dangah world number 1 Tai Tzu Ying hian Scotland nula Kirsty Gilmour chu 21-10, 19-21, 21-11 in a lo hneh ve thung - Tai leh Sindhu inkhela chak zawk hi an tlang chhoh zel a rinawm viau.

Olympic medal vawi hnih la tawh Sindhu chuan, "Season ṭha tak ka hmang lo a, tun tournament ka khelh danah erawh ka lawm. Tun hnaia inelna ka hmachhawn hnuhnung pathumah semifinal ka thleng a, mahse final ka lut lo vek.

"Tun ṭumah pawh beiseina ka nei sang, amaherawhchu tournament kan khelh zawh hma chuan engmah hi sawi lawk theih a ni lo," tiin a ṭawng fimkhur hle, champion lai a nih avangin player dangin an hmachhawn châk bik vak lo ang.