Mizo nulate an chak lo

Basketball Federation of India hnuaiah Mizo hmeichhia ten a vawi khat nan inelna an hmachhawn a, an khingpui Meghalaya lakah 54-26 in an chak lo a ni.

Mizo hmeichhiante tan 71st Senior National Basketball Championships Men & Women – North East Zone khelh hi thil thar a ni a, an match hmasa berah a thlengtu an hmachhawn nghal avangin thil a awlsam lo.

North East Zone aṭang hian champion team chauhin final round an lut dawn. Mizoram hian vawiinah an match hnihna atan Assam an hmachhawn chhunzawm leh nghal ang.

Mizoram assistant coach Lalrinzuala chuan, "Inelna sang kan hmachhawn vawi khatna a ni a, kan duh ang result ni lo mah se kan naute khelh danah kan lawm. Tihsual chu a awm thei, a thlengtu hmachhawn hi chu eng inelnaah pawh a awlsam lo," tiin a sawi.

Mizoram Result & Fixture
December 16, Ningani
Meghalaya 54 - 26 Mizoram

December 17, Zirtawpni
Mizoram 01:30 PM Assam