Intlansiak 23 awm tir an tum

Formula 1 season an zo chiah a, nakkum lama an kal dan tur an buaipui chhunzawm leh nghal. F1 thuneitu sang lam chuan calendar an duang chhin a, season tharah chuan intlansiak 23 awmtir an tum.

Ruahman dan chuan Match 20 hian Bahrain Grand Prix aṭangin an ṭan ang, kumin ang bawkin a tawpna tur chu Abu Dhabi GP a ni dawn. Intlansiak hnuhnung ber hi November 20-a neih tur a ni ang.

Formula 1 leh China ten inremna an nei sa a, hripui leng vangin Chinese GP a awm dawn rih lo. An inrem dan chuan hri leng a ziaawm hunah, a rang thei ang berah China ramah hian F1 tlan leh tur a ni.