Mumbai-in Chennaiyin hneh hram

Nilaini zan Indian Super League inkhelah Mumbai City chuan 1-0 in Chennaiyin an hneh hram a, table chung berah an awm chhunzawm zel - match ruk aṭangin point 15 ngawt an nei tawh.

Club pahnih hi goal khung loin an ṭin mai dawn niin a lang hman a, mahse, Mumbai defender Rahul Bheke chuan hei hi ngai ngam loin minute 86-naah a khung a, Chennai club tan chhanletna hun a awm tawh lo.

Mumbai City tan ṭum dang ang bawkin Lalengmawia (Apuia) chuan inkhel bul a ṭan a, Vaivakawn tlangval hi ISL champion tan a pawimawh chhunzawm zel - minute 90 a khel tluan.

Chennaiyin lamah Jerry Lalrinzuala leh Lallianzuala Chhangte ten inkhel bul an ṭan a, Jerr-a'n Lukasz Gikiewicz tana a siamsak Polish striker-in goal-a a chantir thei lo chu a uiawm hle.

Zanin ISL-ah inkhel pakhat a awm dawn a, dar 7:30-ah match khat chiah la chak NorthEast United leh chak la nei lo East Bengal te an inkhel ang.

Club pahnih tan insiamremna hun ṭha ve ve a ni a, a chak lo zawk tan tun season-a a sang pali zinga tel beisei loh law law a fuh mai thei!

Aizawl FC coach hlui Khalid Jamil enkawlna hnuaia khel NorthEast United-ah Rochharzela, Lalkhawpuimawia (Mapuia), R. Laldanmawia, Joe Zoherliana leh William Lalnunfela te an awm a, khup hliam zai vangin Emanuel Lalchhanchhuaha a chawl mek bawk.

East Bengal erawh Lalrinliana Hnamte chu Mizo awmchhun a ni thung - tun season-a match ruk an khelh tawhah match li a khel phak a, ISL senior team a zawm hmasak ber season-ah bul a ṭan chhe lo.