Japan-ah khawlum vangin mi 65 an thi

Japan ramin khawlum nasa tak a tuar mek a, khaw lum luat vanga thi hi mi 65 an tling tawh a ni. Mi 22,000 chuang chu damdawi-inah enkawl an ni bawk. Sorkar chuan khawlum an tawrh mek chu natural disaster-ah a puang bawk.

Sorkar chuan mipuite chu khaw lum laka invenna dan tur ngaihtuah a, fimkhur turin a chah.

Thawhṭanni khan Kumagaya khaw lum lam chu 41.1C a tling a, hei hi Japan ram chanchina khaw lum ber ṭum a ni. Khawchin zirtute chuan khaw lum hi a la ziaawm mai dawn rih lo niin an sawi. Tokyo-a khaw lum lam pawh 40C a tling.

Japan Meteorological Agency chuan August thla tir lam thlengin khaw lum lam hian 35C leh a chunglam a la tling dawn niin an sawi.

Ramchhung hmun hrang hrangah khaw lum an tuar mek avangin khawpui tam takah mipuiten uchimizu, 'water ceremony' an hmang a, khaw lum leh kawng sa lutuk tihziaawmna turin ke-a kalna, pavement-te chu tuivawtin an phuh ṭhin a ni.