The Best FIFA Football Awards ; Messi leh Ronaldo te buk a rit ber tawh lo?
FIFA chuan The Best FIFA Football Awards dawng thei tur nominee chu Thawhlehni zan khan an tlangzarh a, Best FIFA Men’s Player-ah Cristiano Ronaldo leh Lionel Messi te awm bawk mah se hming langsar ber an ni tawh lo.
Award ceremony hi September 24 hian London-ah neih tur a ni a, category pali Best FIFA Men’s Player, Best FIFA Men’s Coach, Best FIFA Women’s Player leh Best FIFA Women’s Coach te hnenah chawimawina hi hlan a ni ang. Heng bakah hian goal mawi ber 'FIFA Puskas Award', supporter ṭha ber 'FIFA Fan Award' leh Best FIFA Goalkeeper award te hlan an ni bawk dawn a, heng award pathum dawng thei turte erawh September thla tira phochhuah chauh tur a ni.
Award Kalphung
Football chanchin hre bik expert-te chu group (panel) hnihah inṭhenin nominee a awm tur hi an zirchiang a, 2017-18 season puma an khelh dan ṭanga thlanchhuah an ni.
September thla tir hian category pali aṭangin dawng thei tur pathum ṭheuh chu tlangzarh leh tur a ni ang. Heta thlang thei tur chu category liah ṭhenhran an ni a, an hlut zawng hi 25% vek a ni a. Vote nei chinte chu
1. National team captain zawng zawng
2. National team head coach
3. FIFA.com kaltlangin mipui tan a thlan theih
4. Ram hrang hranga aiawh media (member 200 bawr vel)
Ronaldo leh Messi
Best FIFA Men’s Player hi Real Madrid aṭanga Juventus zawmtu Cristiano Ronaldo-a'n a la dawng ve ve a, Barcelona star Lionel Messi chu pahnihna ni ve veiin France champion puitu Antoine Griezmann leh Brazil forward Neymar ten vawi khat ve ve pathumna dinhmun an hauh a. Tun
ṭumah hian PSG star Neymar erawh player 10 thlanchhuah zingah a tel lo.
Season pum thlir tur a nih avangin Champions League-a top scorer ni thei leh Real Madrid champion puitu Ronaldo hi dah bo theih a la ni bik lo a, Portugal captain hian Russia ramah pawh goal li ngawt khungin World Cup-a hattrick siam thei upa ber a ni. Lionel Messi captian-na hnuaiah Argentina-in beisei an pha lo a, Barcelona star hian Nigeria ramah goal ropui khung mah se World Cup a khelh dan aṭanga thlir chuan a aia dawng tur an awn. Amaherawhchu, a club khelhna Barca chu La Liga leh Copa del Rey a champion pui a, league-ah goal 34 khungin Pichichi (La Liga top scorer) leh European Golden Boot Awards a dawn kawp avangin midang chunga la dah theih a ni.
Ronaldo leh Messi te an la ropui reng a, amaherawhchu FIFA World Cup-a an ram an chet ṭhat pui theih loh ve ve ve avangin tun ṭum Best FIFA Football Awards-ah chuan buk rit ber an ni tawh lo.
Mi thar chu
FIFA World Cup neih zawh takah Luka Modric chuan Croatia final a thlen pui a, golden ball hial a dawn avangin hming langsar zingah a tel pha. Club lamah ni se Real Madrid CF player pawimawh a nih avangin Ronaldo nomawi dawn ang chu a dawng ve vek bawk. Los Blancos tana khel Raphael Varane hming a lang bawk a, anni hian FIFA World Cup nomawi meuh chawi mah se tlarhnung lam tan chuan beisei tih san ngam chi a ni lo ang.
World Cup nomawi zingah Antoine Griezmann a beiseiawm. Atletico Madrid forward hian bronze ball chauh dawng mah se goal li khungin assists vawi hnih a nei a, mipui ngainat player a nih avangin a tan hun ṭha a inher chhuak thei a. Rawlthar duhawm Kylian Mbappe pawh World Cup-ah nasa taka hming a chher avangin sawi bo a thei a ni lo–kum 19 mi chauh niin best young player-ah thlan a ni a, Russia ramah goal li a khung bawk.
Premier League lamin player pali an thawh a, Liverpool tana season ṭha tak hmangtu Mohamed Salah chu a phu ang ngeiin nominee-ah tel mah se nomawi a chawi loh avang leh World Cup-a an ram Egypt-in point an hlawh chhuak lo. Salah ang thoin Harry Kane-a'n nomawi a keng thei lo a, amaherawhchu WC 2018 golden boot dawngtu a nih miau avangin nominee-a awm a phu.
Belgium duo Kevin de Bruyne leh Eden Hazard te World Cup-ah an che ṭha a, an tawpna erawh pathumna a ni thung. Premier League-a khel ve veah KDB-a'n Premier League leh League Cup nomawi nen season a khar a, FA Cup nomawi nena season khartu Hazard-a'n WC-ah Silver Ball a dawn tel avangin buk rit zawk tur hriatthiam a har hle.
World Cup nomawi chawitu
Kum 1998 khan Didier Deschamps chuan a captain-na hnuaiah France champion pui a, kuminah a coach-na hnuaiah Les Bleus a champion pui leh bawk. Deschamps elpha thei tur World Cup 1998-a a teammate Zinedine Zidane a ni a, ani hian kum hnih leh a chanve chhungin Champions League nomawi vawi thum a chawi a, hemi zawh hian Real Madrid enkawl hna a chawlhsan.
Nominee zingah beisei phak baka England leh Russia thlenpuitu coach Gareth Southgate leh Stanislav Cherchesov te an tel a, Croatia leh Belgium chet ṭhat puitu Zlatko Dalic leh Roberto Martinez te an awm bawk.
Premier League record siam chunga Manchester City champion puitu Pep Guardiola, La Liga-a Barcelona champon puitu Ernesto Valverde, Serie A-a Juventus champion puitu Massimiliano Allegri, Champions League final-a Liverpool hruai thlengtu Jurgen Klopp leh budget nei tlem chunga Barca leh Real elpha ṭhin Atletico Madrid coach Diego Simeone te telh an ni bawk.