Mesut Ozil kuangkuahtu Emery

Mesut Ozil-a'n Ger­many tan a inkhelh tawh loh tur thu a sawi chuan titi a ti tam a, amah demtu an awm laiin German Foot­ball Association chet dan sawisetu pawh an tam. Arsenal manger Unai Emery chuan a midfielder duh lai thlavang a hauh a, a tan Gunners chu in a nih thu a sawi.

Arsenal manager thar Emery chuan, "A theihna sang tak ang a pho chhuah theih nan mitin hian kan theihtawpin kan pui dawn a ni. He hmuna awmte chuan Mesut hi an zah a, atan in leh chhungkua nih an duh," tiin Ozil chu thlamuang taka awm turin a duh.

Kum 29 mi Ozil hian World Cup a khelh zawh hnuah team training a zawm leh tawh a, tukin zing dar 5:05-ah khan Singa­pore-ah Atletico Madrid nen friendly match an khel. Germany international hlui hian Spanish club hi a hmachhawn a la rinawm loh a, Inrinnia Paris Saint-Germain nen an inkhelh hunah erawh inlan tura ngaih a ni.

Spanish manager chuan sawi zawmin, "Tawnhriat a nei hnem tawh a, theihna a neih san bakah a rilru a paukhauh bawk. Kan zingah season duhawm tak a hman chhoh theih ngei ka ring a ni," tiin a sawi. Arsenal chief executive Ivan Gazidis pawhin Ozil an ṭan thu leh a lamah an din tlat thu a sawi ve tawh bawk a ni.

Sevilla manager hlui Emery-a'n Arsenal a enkawl hnuah hruaitu nih tling captain tur panga ngawt a duh thu a sawi tawh a, player panga a tihte hi an hming la sawi chiang lo mah se goalkeeper Petr Cech chuan an zingah Ozil hi a tel a rin thu a sawi ve bawk.

Czech Republic inter­national hlui Cech chuan, "Manager sawi tur a ni a, chutihrualin Mesut hi kan player zingah tawnhriat nei ṭha leh hruaitu nih tling zinga mi a ni. Ram leh club tan match a khel hnem tawh a, aṭangkai leh pawimawh zingah a tel ṭhin bawk. Player dangte nena inel turin hun rei lote chhungin a inpeih ang," a ti.