Everton player manto ber Richarlison

Premier League club Ever­ton chuan an player manto ber ni turin Richarlison an lalut a, Watford aṭanga Brazilian forward lalut tur hian pound maktaduai 50 an inseng.

Everton hian pound mak­taduai 35 chu Richarlison manah hian an pe phawt a, a khelh ṭhat chhoh dan a zirin pound maktaduai 15 dang hi an pe leh dawn a ni - kum nga chhung atan contract a ziak.

Merseyside club hian August 2017 khan Gylfi Sigurds­son chu an club player manto ber ni turin Swansea City aṭangin pound maktaduai 45-in an lalut a, Iceland midfielder man zat hi Richarlison chuan a khum dawn tihna a ni.

Richarlison a hlim

Kum 21 mi forward hian kum 2017 khan Fluminense aṭangin Watford hi pound mak­taduai 11.5-in a zawm a, Premier League-a seng luttu hi a hunlaia Watford coach, tuna Everton boss ni ta Marco Silva a ni.

Richarlison chuan, "Ever­ton-ah hian hlawhtlinna tam tak chhar ka duh a, Marca Silva nena kan thawkdun leh tur hi ka tan chuan a pawimawh takzet a ni. Player ka nihna angin inzir belh reng ka ngai a, he hmunah hian hmasawn zel turin ka rawn kal a ni," a ti.

Brazil Under 20 tana vawi 10 inlan tawh Richarlison hian Silva a zui chhan chu hmasawn tura a puih theih a beisei vang a nih thu a sawi a, Brazil tana khelh a duh. Richarlison chuan, "Watford-a kan thawhdun lai khan nasa takin min pui a, engtikniah emaw chuan Brazil national team tana khel phak khawpin min kaihhruai ka beisei a ni," a ti a, a pu hlui nena an thawk­dun leh tur chu a hlim hle.

Club lian maw?

Richarlison chuan, "Everton hian ka chungah rinna an nghah avangin he club tan hian a ṭha thei ang bera khelh ka duh a, khelmualah ka theihna pholan ka tum a ni. England-a club lian ber zinga miah hian ka duhthusam te chu a tak ram an chan ka beisei," a ti.

Everton player manto berin a club thar hi 'club lian' tiin sawi mah se ṭawmpuitu erawh a tlem zawk an nih a rinawm. Iranian sumdawng hausa Farhad Moshiri neitu nihna hnuaia intuai thar tum mek team-in league nomawi an chawi hnuhnung ber chu 1987 kha a ni a, major trophy an chawi hnuhnung ber chu 1995-a FA Cup an champion kha a ni.

Richarlison hian Premier League-a a match hmasa 12 aṭang­in goal nga a khung a, mahse November hnuah erawh goal khung emaw assist a nei miah lo thung.

Silva a lawm

Everton boss tharin a duh tak player a lalut thei a, a hlim hle. Portuguese coach chuan, "Richarlison hi player ṭha tak a ni a, squad-ah team tana khel phak tura inelna boruak a ti sang sawt dawn a ni.

"Ka tan chuan squad chhung­a player inel hi club tana thil ṭha tak a ni," tiin squad chhah tak neih a duh thu a sawi a, "Player che rang tak, tharum ngah, ball thiam leh position thuma khel thei a ni a, goal a la khung thei cheu," a ti bawk - a player thar a fak hle.

Richarlison hian Fluminense tan a khelh laiin match 67-a khelh sakah goal 19 a khung a, season hmasaah Watford tan match 41 inlanin goal nga a khung a, Silva hnuaiah insiamṭhat a beisei ang.