Chhetri-a'n contract thar a ziak

India captain Sunil Chhetri chuan Bengaluru FC-ah season khat dang cham turin contract thar a ziak a, 2020-2021 season thleng chu Indian Super League club tan hian a khel dawn tihna a ni. Chhetri hian kum khatah nuai 150 a hlawh mek a, a contract thara a hlawh tur zat hi tarlan a ni lo.

Kum 33 mi striker hian season hmasa ṭan dawn khan Bengaluru-ah hian kum thum chhung atan contract a ziak a, a contract neihlai ang chuan 2019-2020 season tawp ruala contract zo tur a ni.

Mahse, kum khat dang cham tura contract a ziah leh tak si-ah chuan ISL club-ah hian kum 36 a nih thlengin a cham dawn tihna a ni a, Bangalore club-ah a career a hmang zo ngei dawn niin a lang.

India tan match 102-a inlana goal 65 khung thei strtiker hi AIFF Player of the Year-ah thlan a ni a, he chawimawina hi vawi nga a dawnna niin season hman zawh takah khan ISL Hero of the League-ah thlan a ni bawk a, Bengaluru tan inelna hrang hrangah match 30 khelin goal 22 a khung sak a ni.