Hockey World Cup India hmachhawn tur Ireland

India nula ten Hockey Women's World Cup 2018-a an match hnihna chu zanin dar 6:30 hian an khel dawn a, Mizo nula Lalremsiami Hmar telna India team hian point thum hmu tawh Ireland an hmachhawn dawn - inkhel hi Star Sports 2 HD-ah en theih a ni ang.

An match hmasa berah India hian a thlengtu England an hneh teuh hle, goal khat faia hma an hruai reng hnuah hun tawp dawna an goal chhuah vangin an inhnehtawkpui. Pool B inkhel dangah Ireland hian rinkai lo zawk nichungin United States 3-1 in an hneh thung a, an group aṭanga knock out stage lut tur a la hriat loh.

Kolasib chhul chhuak Siami chuan, "Ireland hi kan group hmahruai mektu an ni a, mahse kan huphurh hran lo. Nidang ang bawkin attacking game kan khelh ka ring a, chumi hnuah kan khelh dan a zirin a la inthlak theih bawk," tiin Vanglaini a hrilh a, a huphurh bik lo.

India tana Asian Champions Trophy vaw chhuak tawh Siami hian England lakah goal khung theihna hun ṭha a neih vawi hnih a chhawr ṭangkai thei lo a, ani bakah hian captain Rani Rampal a chet ṭhat a pawimawh ang.

India player World Cup khel zinga naupang ber Siami chuan, "Rani hi World Cup a vawi hnih khelhna a ni a, kan tan chuan a tawnhriat neih tawhte hi a pawimawh thei hle," tiin ram tana match 200 chuang khel tawh forward pawimawhna a sawi bawk.

2018 Women's Hockey World Cup-ah hian ram 16 an inlan a, pool paliah ṭhen niin ram pali zel an awm. Pool khata awmkhawmte hi vawi khat ṭheuh an inkhel kual vek dawn a, chumi hnua point hmu sang ber chu quarterfinal an lut ang - a dang pahnih chuan playoff an khelh a ngai dawn a ni.