Barcelona-in Malcom an lambun!

AS Roma-in pound maktaduai 32-a Bordeaux winger Malcom an lakluh thu an puan hnu lawkah Barcelona an lo lang a, Roma fan-te hlim authawm pawh a reh hmain Malcom hi Barcelona player a ni!

Kum 21 mi forward hian a thu phungin Roma pan hi a remti hman a, Bordeaux lam pawhin Italy pan an remtih sak tawh. Mahse, Spanish champion an lo lang a, pawisa tam zawk nen Bordeaux an dawr.

French club hian Roma nena an inremna chu hnawlin pound maktaduai 36.5-a Barcelona dawrna thar an pawm ta zawk a, Roma player tura ngaih hian Barca tan kum nga chhung khel turin contract a ziak ta zawk a ni.

Roma lungawi lo

Malcom nei tawha inngai Roma kut ruakin an awm a, Italian club hi Barcelona, Bordeaux leh Malcom chungah an lungawi thei lo a, Roma sporting director Monchi chuan lehkhaa ziahfel thil la awm lo mah se dan anga hma an lak theih dawn leh dawn loh chungchang an ngaihven thu a sawi.

Monchi chuan, "Malcom-a agent Fernando Garcia nen kan inbia a, Rome-a a rawn kalna turin Bordeaux-in engkim an chinfel tawh leh tawh loh chungchang a thli thlai tur thu min hrilh.

"Mahse, chumi hnu lawkah chuan Barcelona an inlar ve avangin Bordeaux leh Malcom agent-te chuan kan ngamna zat san tura min beisei thu hrilh ka ni a, player lilamna hmuna awm ang mai nih kha kan duh lo a, kan inhnukdawk nghal a ni," a ti.

Engtin zel?

Roma-in Malcom lalut tura Bordeaux inremna an neihpui thu an sawi khan mimal thilah inreman an la neih loh thu leh medical paltlang a la mamawh tur thu an sawi tel.

Mahse, Roma sporting director Monchi chuan hei hian Bordeaux leh Malcom tan chhuanlam tlingah a ngai lo. Spanish football-a zah hlawh tak Monchi chuan, "Lehkhaa engmah kan la ziak fel lo tih hi a dik ngei a, mahse agent leh Bordeaux President te nena kan inbiakna zawng zawng kha ennawn phu an ni," tiin dan anga hma lak a nih theih nan 'message' in thawn chu a tlin tawk thu a sawi.

Monchi hi Sevilla-a director of football a nih laia Diego Capel, Alberto Moreno, Jesus Navas, Antonio Puerta, Sergio Ramos leh Jose Antonio Reyes te zawng chhuaktu a ni a, Adriano, Dani Alves, Julio Baptista, Federico Fazio, Seydou Keita leh Ivan Rakitic te chu tlawm taka lei bawkin Spanish football-ah a theuneu lo hle.

Tu nge Malcom?

Roma-in inremna an neihpui tawh hnua Barcelona meuh an inrawlh buai duhna player hi eng ang taka ṭhe nge a nih, tih chu zawhna awm a ni a, Ligue 1 lamah chuan Brazilian forward hian a hming a chher tawh hle.

Arsenal, Everton leh Tottenham Hotspur te pawhin an beisei nia sawi winger hian Bordeaux tan Ligue 1 game 84-a khelhah goal 20 a khung sak a, assist vawi 13 a nei bawk–goal 33-ah a inrawlh tihna a ni.

Season hman zawh takah khan French club tan hian inelna hrang hrangah match 38 khelin goal 12 a khung a, World Cup-a Brazil squad-ah erawh a lang phak lo.

Willian thlakna?

Barcelona hian Chelsea winger Willian chu lakluh tumin an dawr nia sawi a awm a, mahse Blues hian pound maktaduai 70 ngawt an chhiar avangin Barca hian an ngam lo.

Catalan club-in an duhthlan hmasa ber chu Antoine Griezmann a ni a, mahse French forward hian Atletico Madrid a chhuahsan dawn lo tih nemngheh nan contract thar a ziak.

World champion player an chang lo a, World Cup-a Brazil tana inlan Willian lam an hawi leh a, an chan loh leh tak avangin squad-a tel phak lo Malcom an chang ta niin a lang.

Dembele a derthawng?

Malcom-a'n Barcelona a pan ruala sawi awm chu Ousmane Dembele dinhmun derthawn thu a ni. France international hian Nou Camp-a a season hmasa berah hliam na tak a tawrh avangin beisei angin a khel chhunzawm lo.

Liverpool nena sawizawm forward hi Barcelona-in Borussia Dortmund aṭanga an lei khan pound maktaduai 135.5-in an lei a, mahse Barca hian a man an la pe tla vek lo–pound maktaduai 35.53 chu La Liga leh Champions League lama a inlan dan a zira la pek leh tur a ni.

Barca hian heti zat pawisa pek belha Dembele kawl chhunzawm zel nge, manto taka hralha Malcom-a innghah an duh dawn, tih chu zawhna awm a ni a, hetihrual hian Willian chu beidawn san an la tum lo nia sawi a awm bawk.