Zaninah Lloyd MFA Futsal Tourney Final
Mizoram Football Association-in season ṭan nana an buatsaih Lloyd MFA Futsal Tournament final chu zanin hian Lammualah khelh a ni dawn a, futsal tui tan 'hmuhnawm' chhawp chhuah a ni ang.
Veteran final aṭangin ṭan a ni dawn a, zan dar 6:30-ah champion lai 77 FC leh Ditea's FC te an inkhel dawn. Darkar khat hnuah Division One final an khel ang a, season ending tournament champion Paul FC leh te an khel dawn. Inelna sang ber League club final-ah Ramhlun South FC leh Chhinga Veng FC te an inkhel ang.
Phuba lak hun?
Ditea's FC-in veteran inelna hnuhnung ber league round-ah 77 FC an hneh a, amaherawhchu a pawimawh ber final-ah veteran inelna awm apianga champion 77 FC an hneh lo.
Zanin hi Ditea's FC tan phuba lakna hun remchang tihin a sawi theih a, Joel Lalthangmawia leh Lalthanpuia te an kawl avangin chak thei turin theihna an nei a. Amaherawhchu, 77 FC hi AFC B Licence coach Lalremtluanga hoin an khel a, goal khung turin Vanlalfela te an kawl bawk avangin phuba lak a awlsam lo ang.
Champion tur Paul FC?
Paul FC player-te hi MPL cub Mizoram Police, Chhinga Veng leh Bethlehem Vengthlang tana khel te an ni a, League One inelna an thunun. Semifinal-ah Republic Veng club Control Control lakah 6-2 a an hnufual hnuah 8-8 in a draw a, extra time-ah 10-8 a an chak leh theih avangin champion tura rinkai an ni.
An khingpui tur FC Khatla tan awmze neia game plan neih a ṭul dawn a, chutihrualin semifinal-ah 9-2 zetin Team Gideon, Kanan an la hneh theih avangin Paul FC tan pawh fimkhur a ṭul ang.
A thiam ber zawnna
Tualchhung football-ah Futsal League a sang ber a, club 16 awmna aṭanga final lut thei Chhinga Veng leh Ramhlun South inkhela chak zawk hi tun inenlna thiam ber tur chu an ni.
Chhinga Veng hi Lalremruata'n a enkawl a, MPL club Chhinga Veng leh first division club Kanan player te lakhawmin futsal khel thiam Lalsawmzela leh Lalmuanpuia te an kawl avangin champion tura rinkai an n ni a. Ramhlun South hi Robert Lalthlamuana hoin bul an ṭan a, TFA Academy chhuak defender awm loh hnuah pawh team anga an khelh avangin an tawh a khirh khawp ang.