Champion beiseitu Liverpool an chak

Liverpool chuan Premier League nomawi chawi turin an ṭha tawk tih an pholang leh ta a, Ningani zan khan an mikhual Newcastle United chu 3-1 in an hneh.

Magpies tan Jonjo Shelvey chuan minute sarihna lekah goal hmahruai a khung avangin mikhual team-in beiseina an nei sang a, mahse, Liverpool chhaih kawlhna goal mai a ni.

Reds tan Diogo Jota, Mohamed Salah leh Trent Alexander-Arnold ten goal khat ṭheuh khungin an chhanglet a, a tawpah mualneitu Liverpool an chak.

Jurgen Klopp-a naute hian Pathianni zan dar 10:00-ah league match khel turin Tottenham Hotspur an lenchilh zui dawn a, Antonio Conte hnuaia insiamṭha mek team hmachhawn hi a awlsam lo ang.

Barakhaih
Magpies boss Eddie Howe-a'n Liverpool nawr turin an ṭha tawk lo tih a hai lo a, tlarhnung lam ven chu thupui berah neiin, counter-attacking football chu innghah nan a hmang.

Howe hian 4-5-1 formation hmangin club top scorer Callum Wilson, Miguel Almiron leh Joe Willock te bench-ah a dah a, an talbuai phah lo - minute sarihnaah Thiago Alcantara a chesual a, a ball petchhuah tur chu Shelvey ke bulah tak a tla.

Liverpool midfielder hian a club hlui lakah ṭha zetin a khung a, a goal khung a lawm duh lo. Mahse, Magpies phur chhung erawh a rei lo hle - minute 21-naah Jota chuan si phurh a rawn sut a, Liverpool an phur sawt.

Jota goal khung hma hian Liverpool ball cross luh tauh a tumna lamah Magpies player Isaac Hayden chu a teammate nen an intauh fuh a, mahse, referee-in inkhel chhunzawm tura a tih avangin Jota chuan si phurh sutna hun atan a hmang.

A hming Salah
Anfield-ah Liverpool-in point khat leka lungawi an tum lo - si phurh an sut aṭanga minute li hnu lawkah Salah-a'n hmahruaina goal a khung zui a, Premier League-a match 15 chhung a zawna goal emaw assist emaw nei ziah record Jamie Vardy-a lo siam tawh chu a nih rual.

Kum 29 mi Salah hian tun season Premier League-ah match 17 khelin goal 15 a khung tawh a, assist vawi kua a nei - tun season-a Premier League-a goal khung hnem lama amah hnaih bertu Jota leh Vardy ten goal kua ve ve chiah an la khung!

Salah hian inelna hrang hrangah match 23 khelin goal 22 a khung a, FIFA FIFPro World XI shorlist 23 zinga lang phak lo season hman dan atan chuan a ṭha mah mah - Salah hi a vanneih zan ni se, Jota nen goal la khung belh thei ve ve an ni.

Magpies-in Allan Saint-Maximin, Jacob Murphy leh Shelvey te hmangin chance nei ve bawk mah se an chhawr lo a, Liverpool bawkin an khung nawn - minute 87-naah Roberto Firmino siamsak chu Arnold chuan box pawn aṭangin mawi zetin a khung a, Premier League-ah goal hnih khungin assist vawi sarih a nei ta.

Hmabak Spurs
Ṭum dang ang thoin Liverpool inkhel a hmuhnawm a, Magpies-in chance sawi tur nei ve bawk mah se kawng tinrengah Howe-a naute hian Merseyside club hi an phak lo tih a lang.

Pathianni zanah Spurs an lenchilh zui dawn a, mahse, tun hnaiah Covid-19 in khawthlang ramte a run thar leh avangin he inkhel pawh hi an kaltlangpui ngei ang em, tih chu sawichian theih a la ni lo.

Liverpool player zingah Virgil van Dijk, Fabinho leh Curtis Jones te chu Covid-19 an kai avangin Newcastle an hmachhawn thei lo a, player dang erawh an ṭha thung - Pathianni zanah an inlan a rinawm chiah lo.

Spurs-in an match khelh tur pathum chu vur tla nasa leh Covid-19 vangin khelh hun an sawn tawh a, an buai hle - Premier League match dang sawn a awm nual bawk a, English football a buai leh ta hle.

Inkhel ang!
Jurgen Klopp chuan inkhelh zel a duh thu a sawi a, hri leng vangin match tihtawp leh ṭhin chu awmze nei lo mai a nih thu a sawi. German coach chuan, "Premier League tihtawp hi a ṭulna ka hre lo.

"Chawl ila, kan lo kir hunah pawh hri chu a la awm tho ang. Tuna inkhelh kan chawlh avang hian hri hi kiam dawn se, lawm taka chawlh thlang tur zinga mi ka ni. Mahse, kan chawlh avangin hri hi a kiam thut dawn lo tih ka hria.

"Chuvang chuan chawlh hi eng nge a ṭangkaina? Pathianni zanah Spurs nen kan inkhelh theih hram ka beisei," a ti a, Covid-19 indan tir reng a duh lo.

Hetihlai hian Spurs erawh club training ground thlenga khar ngaiin Covid-in a lo tibuai tawh a, an match khelh tur an ṭhulh zel bawk avangin player-te phur vanglai tak a ni lo ang tih a chiang.