Champion lai Sindhu a tla

BWF World Championships 2021 khelh laiah hmeichhe singles champion lai PV Sindhu a tla. Nimin tlaia quarterfinal inkhelah Sindhu hi world number 1 Tai Tzu Ying lakah 21-17, 21-13 in a chak lo.

Tokyo 2020 semifinal-ah pawh khan Sindhu-i'n Chinese Taipei nu bawk hi a ngam lo. Tun hnai an intawn hnuhnung pangaah a zawnin Sindhu a chak lo vek, Indian shuttler tana hlawhtinna daltu lian tak a ni.

Sindhu-i'n bul a ṭan fuh lo, game hmasaah 11-6 a hnufual laite a nei hial. Zawimuangin a pawtthla a, an inkarah point hnih chauh a awm hman hial, mahse, a tawpah a zawna vawi hnih tih sual a neih avangin game a hloh.

Game hnihnaah an in bei tawk, hma hruai fal thei an awm lo. 7-7 a nih hnuah Tai zawkin a zawna point hmuin a kal fal hret. Indian star hian umphak leh lai nei mah se, boruak san lai takin a tisualtu zawk a ni zel.

World number 1 Tzu Ying a huaisen a, hun pawimawh laia point hmutu a nih zel theih avangin hnufual lai nei loin a tlang. Game hnuhnung zawkah hian a tirah inbei tawk viau mah se, a tawpah chuan point sarih zetin a sang fal zawk a ni.

Mipa singles lamah Kidambi Srikanth chuan minute 40 chhungin Lu Guang Zu a hneh a, seeded 12-na hian quarterfinal a inhlangkai.