Mizoram an chak

Senior Nationals NorthEast Zonal Basketball Championship-ah Mizoram mipa team-in nimin khan inelna thlengtu Meghalaya 64-53 in an hneh a, match hmasa berah Tripura 124-8 a sawp bawkin match hnih khelh an la chak ve ve.

Mizoram tan Meghalaya hneh hi result ṭha a ni a, chutihrualin NorthEast champion chauhin final round an khelh dawn avangin hmabak erawh a la harsa dawn.

Nizan khan Mizoramin Nagaland an hmachhawn a, result kan hre hman lo. Vawiin chawhma dar 11:30-ah Manipur an hmachhawn leh ang.

Mipa team coach KC Lalliantluanga chuan, "Meghalaya hi team ṭha an ni, an hnen aṭangin thil tam tak kan zir ṭhin, tunah chuan kan hnen aṭangin zirlai ṭhenkhat an zir ve tawh," tiin inkhelh hmain a sawi a, a thu sawi ang ngeiin court chhungah thil a thleng.

Mizoram basketball-in hma a sawn zel. Tualchhung inelna Mizoram Super League (MSL) awm hnuah hmasawnna nasa tak a awm tih a hriat, hmasawnna tur lai erawh tam tak a la awm ve bawk.

Mizoram hmeichhe team erawhin nimin khan Assam 81-25 in an hneh lo a, match hmasa berah Meghalaya 54-26 a hneh loin tun inelnaah chak nei lo mah se Basketball Federation of India hnuaia an inelna hmasa ber hi an hlawkpui hle.

Mizoram hmeichhe team assistant coach Lalrinzuala chuan, "BFI hnuaia inelna kan hmachhawn hmasa berah chak lo mah ila lawmna tur a tam. Kan nauten game awmze nei an khel a, hmabak eng tak an nei niah ka ngai," a ti.