Chelsea an chesual, hmabak Wolves

Thomas Tuchel-a hnuaia season bul ṭan ṭha Chelsea vanduai a kaltluang. Blues hi Ningani zan khan Everton-in Stamford Bridge-ah 1-1 in an chelh a, December 19, Pathianni zan hian Molineux Stadium-ah Wolverhampton Wanderers an hmachhawn leh ang.

Chelsea hi Premier League match hnuhnung match sarihah vawi thum chauh an chak a, point 21 hmuh theih aṭangin point 11 chauh an hmuh avangin league hmahruaitu aṭangin pathumnaah an tla thla.

An vanduai

Chelsea-in Leeds United laka 3-2 hnehna an chan hram hnuah Everton hmachhawn turin Stamford Bridge an tlawh a, Covid-19 leh inhliam vangin player pawimawh panga an chhawr thei lo.

Romelu Lukaku, Timo Werner, Callum Hudson-Odoi leh inhliam Ben Chilwell ten Covid-19 an kai a, Kai Havertz-a'n damlohna avangin a khel thei lo bawk. Hetichung hian Blues hi Everton laka team ṭha zawk an ni a, chance pawh an ngah hle.

Chelsea-in ṭan phatah chance an nei mawlh mawlh a, Reece James leh Mason Mount te chu chance hlahtu an ni. Everton keeper Jordan Pickford khel ṭha bawk mah se Blues tlarhmate an finishing a ṭha tawk lo.

Minute 70-naah erawh Chelsea an vannei ta a, James-a ball pek chu Mount-a'n a khung. Blues-in hmahruai an phu a, amaherawhchu an tlarhnungin fiahna pangngai an hmachhawn hmasa berah an chesual.

Everton-in minute 74-naah freekick an hmang ṭangkai a, Anthony Gordon freekick pet chu defender Jarrad Branthwaite-a'n a tlawh lut. Chelsea lamin hun tawp lamah chakna goal khung tumin nawr ngial mah se goal an khung thei tawh lo a, corner kick aṭanga Thiago Silva ball tauh erawh a goal teuh hle.

Covid-19 bawk

Chelsea-in Covid-19 vanga player pawimawh an chhawr thei lo chungin Tuchel-a'n Everton nena an inkhel tur sawn a dil lo a, Wolves nena an inkhel tur hi kaltlangpui loh thei dinhmunah a ding. German manager Tuchel chuan, "Kan hmalam hun hi chu technical and performance advisor Petr Cech leh club director Marina Granovskaia te kutah a awm," tiin inkhel pawn lamah a inrawlh loh thu a sawi.

Inkhelh hi kaltlangpui a nih chuan Blues hian Covid-19 positive-te hi an la chhawr thei dawn lo a, tlarhmaah Christian Pulisic, Mason Mount leh Hakim Ziyech te an awm nawn a ṭul a rinawm. Striker mumal an neih loh avangin Pulisic, Mount leh Ziyech te hi tlarhhmaah an hriam deuh a ṭul ang.

Wolves hian kar laihawlah Brighton an hneh a, Manchester City leh Liverpool lakah pawh 1-0 ve ve chauhin an tlawm. Wolves manager Bruno Lage chuan player zawng zawngin Covid-19 vaccine dose hnih an lak tawh thu a sawi a, player-te chu professional an nih avangin khelmual pawna fimkhur dan tur hrilh ngai loa fimkhur an thiam tur thu a sawi bawk.