Rafael Nadal a lo kir dawn

Tennis court-ah Rafael Nadal kan hmu leh dawn ta. Spanish star hi a ke phah hliam a dam tawh a, tun kar tawpa khelh tur Mubadala World Tennis Championship-ah a inlan dawn; Abu Dhabi-a neih tur hi exhibition event a ni ang.

Kum 35 mi Nadal hian June thla hnu lamah tournament pakhat chiah a la khel - August thla khan hard court inelna Washington Open-ah inlan mah se, hliam vang hian a khel zel thei lo, a hnu lamah chuan a la chawl char char a ni.

Grand Slam vawi 20 champion tawh Nadal chuan, "Tun hma pawhin hliam ka lo nei tawh, damkawr chunga inkhelh chuan result ṭha beisei nghal a harsa ṭhin," tiin a sawi. Hliam vangin Wimbledon, US Open leh Olympic pawh a khel lo.

Tun season tir lamah khan Nadal hi hnungzâng na vangin a buai a, season tawp lamah ke hliam vangin a buai leh. A tan season duhawm tak a ni lo chiang hle, nakkum atan pawh beisei neih san ngam a har viau mai thei.

Nadal chuan, "Thil ropui leh ṭha tak ka beisei nghal lo, ka tana lawmawm lai chu ka inkhel ve leh thei tawh tur hi a ni. A nihna tak sawi chuan hun harsa tak ka tawng a, tun ṭuma ka inlanna tur hi exhibition match ni mah se Australian Open inbuatsaihna a nih avangin a pawimawh," a ti.

Grand Slam nomawi chawi hnem lamah Nadal, Roger Federer leh Novak Djokovic te an intluk mek, nomawi 20 ṭheuh an nei. Australian Open-ah Federer a inlan dawn lo a, Novak dinhmun a la chiang lo - Nadal erawhin inlan ngei a tum.