Mercedes-in bawhzui dawn lo

Formula 1 season tawp tawh mah se thawnthu a la tawp ve lo. Mercedes chu an elpui Red Bull chet danah an lawm lo hle a nih kha, lungawi lohna an lantir bakah ennawn turin an ngen hial - mahse Mercedes chuan an ngenna thlen hi bawhzui an tum ta lo.

Abu Dhabi Grand Prix tlan zawh takah khan, intlansiak tawp dawnah Max Verstappen-a'n a hma a tlan Lewis Hamilton tlan pelin hnehna a chang a, world champion nomawi a kawl lai chu a chhuhsak zui nghal bawk.

Mercedes chuan Max-a chen danah hian dan kalh a awm niah an ngai a, intlansiak a zawh hlimah an duh lohzia an lantir nghal a, a hnuah thuneitu sang hnenah chhui chiang turin hma an la zui bawk - mahse, tunah chuan thil thleng tawh hi bawhzui an tum ta lo.

F1 team champion Mercedes chuan driver champion Verstappen hnenah lawmpuina thu thlenin, "Tun season chhunga inelna nuam leh ropui min chhawp chhuahsak avangin kan lawm. F1 championship i ti ngaihnawmin, in beihna ropui tak min neih pui," tiin a sawi.

Mercedes leh Red Bull inelna hi kumina tawp mai tur a ni dawn lo, season tharah tun aia nasa zawkin an inbei chhunzawm ngei ang. Verstappen leh Hamilton te pawhin team bakah mimal boruak an nei chhunzawm ngei ang.