Nets chakna Kevin Durant

Hripui lengin ti buai viau mah se Brooklyn Nets chuan Philadelphia 76ers an hneh thei tho. Nets chak theihna chhan hi Kevin Durant niin, ani hian point 34 a neih bakah assist pariat neiin, rebound vawi 11 a la bawk.

Nets hian an match hmasa zawkah pawh hri leng vangin player pasarih an chhawr thei lo, tun ṭumah pawh hian an la chhawr thei chuang lo - inkhel thei lo zingah hian James Harden pawh a tel; an ṭhat dan berin an la khel thei lo tihna a ni.

Harsatna karah Durant a rintlak. Nets star hian court chhungah minute 48 hun a hmang a, tun season kal laiah match khata minute a khelh rei ber ṭum a ni. A hliam a dam tawh tih a chiang, rintlak a ni leh ta tih chu a takin a fiah.

Nets coach Steve Nash chuan, "Tun ang renga hrilengin min ti buai a nih chuan eng chen nge kan thlen theih ang tih ka sawi lawk thei lo. Inkaihhruaina leh kalphung ṭha zawk kan mamawhin ka hria," tiin player khel thei lo an ngah chu luhai thlak a ti hle.

Durant chuangchang sawi zuiin Nash chuan, "Kevin-a'n nuam ti taka basketball a khel lai en hi chu a nuam. Inrintawkna a nei sangin engkim a ti thei emaw ni tih mai tur a ni. Chutih rualin mimala innghat tur kan ni lo a, hliam leh harsatna nei thei a ni tih kan hriat a ngai," tiin a sawi.

Nets bakah hian Charlotte Hornets, Chicago Bulls, Los Angeles Lakers leh Sacramento Kings ten hri kai an nei vek a, basketball inelna sang ber hi coronavirus vangin an chawl lailawk leh emaw, khelh dan phung an siam rem leh emaw a nih pawhin a mak lo ang.

Nimin zing NBA regular season inkhel dangah Detroit Pistons chu Indiana Pacers lakah 122-113 in an chak lo, tun hnaiah a zawna vawi 13 zet an tlawmna a ni a, insiamṭhat an mamawh takzet tawh a ni.

Texas lamah New York Knicks chuan Houston Rockets 116-103 in an hneh a, team ṭha Phoenix Suns chuan 118-98 in Washington Wizards an lo hneh ve bawk.