Barca tan chak a hun e!

Xavi meuh an neih hnuah pawh Barcelona an insiamṭha hleithei lo - Catalan club hi match li zet chu a zawnin inelna hrang hrangah an chak zo tawh lo a, an dinhmunin hniam lam a pan zel.

Zanin dar 11:00-ah Catalan club hian Elche an mikhual dawn a, table-a 16-na team lakah pawh an chak zo lo a nih chuan Xavi leh a naute tan European football pawh beisei ngam a harsa dawn.

Sevilla-in zanin dar 1:30-a Atletico Madrid an mikhual tur hi kartawp La Liga-a inkhel en châkawm pawl a ni a, team pahnih inkara point nga awm hi sawr zim tumin Atletico-in chak an beisei ang.

Madrid derby-a chak hlim Real Madrid chuan Pathianni zan dar 1:30-ah Cadiz an mikhual dawn a, Carlo Ancelotti naute hi chak ngei tura beisei an ni.

Buaina ral lian
Season ṭantir aṭangin sum vangin Barcelona an talbuai a, khelmual pawna an buaina an chinfel hmain khelmualah buaina an neih chhunzawm a, coach Ronald Koeman an ban phah hial.

Catalan club hian an club chhungkaw hrechiangtu coach atan an zawng a, Xavi an ruai. Mahse, Spanish coach kaihhruaina hnuaiah eng ruai an ang thei lo - December-ah an la chak miah lo!

December-a an match hmasa berah Real Betis chu 1-0 in an ngam lo a, Bayern Munich chuan 3-0 a sawpin Champions League aṭangin an pet chhuak zui - Europa League an khel dawn.

Bayern laka an tlawm hnuah an insiamṭha dawn emaw tih laiin Osasuna nen 2-2 in an inhnehtawk zui a, Saudi Arabia-ah l Diego Maradona Cup khel zuiin Boca Juniors nen 1-1 in inhnehtawk mah se penalty-ah an tlawm zui.

Chak a ngai
Tun hnaia an result thlirin Barcelona tan chak a ngai tawh tih a lang a, an tlawm leh a nih ngat chuan team boruak thlengin a nghawng dawn - La Liga-ah pariatna an ni mek a, hmahruaitu Real chu match khata khel tlem zawk chungin point 18 ngawtin an thlau tawh!

Barca tan champion beisei chi a ni tawh lo a, tuna an beisei theih san ber chu season thara Champions League khelh phak a ni - palina Atletico chu point ngain an phak lo mek.

Chak mamawh vanglai takin an ṭhat dan berin Barcelona an inlan thei dawn lo a, Sergino Dest, Memphis Depay, Jordi Alba, Sergi Roberto, Pedri, Ansu Fati leh Martin Braithwaite te chu hliam vangin an inlan thei lo vek dawn!

Hetihlai hian defender tawnhriat nei ṭha Gerard Pique chu hrem vangin a inlan thei dawn lo a, Osasuna laka hliam tenau nei Ousmane Dembele dinhmun a chiang lo bawk - tlarhmaah tawnhriat nei ṭha Luuk de Jong chu rawlthar duhawm Gavi leh Abde Ezzalzouli ten an thlawp a rinawm.