Champion tum Milan hmaah Napoli

Serie A champion nih tum AC Milan leh Napoli te chu Pathianni zan dar 1:15-ah an intawng dawn. San Siro-a inkhel hi hmahruaitu nih inchuhna ni lo mah se, nomawi chawi tum pahnih an nih avangin a pawimawh dawn.

Milan leh Napoli te hi season tir lamah khan match 12 chhung ve ve chu tlawm loin an kaltluang thei. Mahse, tun hnaiah an che sual zeuh zeuh a, table hmahruaitu chu champion lai Inter Milan an ni leh daih tawh.

Serie A an match hnuhnung parukah Milan hi vawi hnih chiah an chak, an khingpui tur Napoli chu an match hnuhnung pangaah vawi thum an tlawm. Inter Milan el phak turin insiamṭhat an mamawh takzet tawh.

Napoli inringtawk
Napoli coach Luciano Spalletti chuan, "Milan nena kan inkhelh tur hi kan tan chuan a pawimawh takzet. Kan tana siamrem ngai leh siamṭhat ngai laite tih felna hun a ni. Kar tluanin training ṭha takin kan nei thei a, chanchin lawmawm a ni.

"Player ṭhenkhat hliam an dam a, ṭhenkhat chu coronavirus lak aṭangin an dam leh tawh bawk," a ti. Tun hnaiah Victor Osimhen, Fabian Ruiz, Kalidou Koulibaly leh Stanislav Lobotka te an chhawr thei lo a, zanin atan pawh an dinhmun a chiang lo.

Spalletti chuan sawi zawmin, "Hripui len lai a nih miau avangin engmah hi 100% a sawi lawk theih a ni ṭhin lo. Squad neih chhah a pawimawhzia kan hre nawn zel a, player mal chauh ni loin inkhel thei tura fit kan neih hnem a ngai," tiin a sawi.

Hun pawimawh
Season hmasa khan AC Milan hian ṭha takin bul an lo ṭan tawh, mahse krismas vuatvet leh kum thar tirah an talbuai a, a tawp lamah insiamṭha leh thei mah se season a tawp meuh chuan an hmelma leh elpui Inter Milan an phak lo hle.

Stefano Pioli naute hian nikum ang bawkin Inter lakah an hmahruaina an chan leh mek, hunpui laia an chesual thui a nih chuan a pawi leh dawn. Chuvangin champion an duh a nih chuan an elpui lak aṭanga point laksak theih a pawimawh dawn.

Napoli ang bawkin Milan pawhin hliam an ngah. Ante Rebic, Simon Kjaer, Olivier Giroud leh Rafael Leao te an chawl mek a, inkhel pawimawhah striker Zlatan Ibrahimovic chungah mawhphurhna a sang ang.

Dybala a dam
Cristiano Ronaldo chhuah hnuah Juventus tan Paulo Dybala pawimawhna a sang zual. Amaherawhchu, Argentine striker hi hliamin a ti buai fo, an match hnuhnung berah pawh hliam tenau a tuar - zanina Bologna an lenchilh hunah erawh inlan thei tura beisei a ni.

Kum 27 mi Dybala hian tun season inelna hrang hrangah match 15 aṭangin goal riat a khung tawh, league bikah match 12 aṭangin goal nga a khung. Turin club tan hian thlamuanpui tham a nih zia a taka a lantir a ngai dawn.

Massimiliano Allegri-a'n beisei angin season bul a ṭan pui lo a, Old Lady tan hian nomawi chawi beiseina la thamral lo mah se a zuih tawh hle. A sang pali zinga tel phak ngei erawh an tum dawn, tunah hian pasarihna an ni mek.