Bengaluru vs Bagan: Goal a sur!

Ningani zan Indian Super League inkhelah goal a sur a, Indian club langsar pahnih Bengaluru leh ATK Mohun Bagan te chu 3-3 in an inhnehtawk.

Kolkata club-in minute 13-na lekah goal hmahruai an khung a, Hugo Boumous-a corner pet aṭanga ball kal chu Subhasish Bose chuan ṭha takin a tauh lut.

Mahse, Bagan-in hma an hruai chhung hi a rei lo - minute nga hnuah Cleiton Silva chuan ama penalty hlawhchhuah chu si phurh sut nan a khung a, 1-1 a ni der.

Bengaluru an phur laklawh a, Kolkata club lakah chak ngei an duh. Danish Farooq Bhat chuan minute 26-naah a khung ve leh a, 2-1 in hma an hruai.

‘Kashmiri Ronaldo' hming lem an pek Danish tan ISL-a a goal hmasa ber a ni a, kum 25 mi winger hian Real Kashmir tan I League lamah a hming a lo chher tawh.

Mahse, Bagan-in tlawm mai an tum bik lo - ISL-a hlawh hnem pawl Boumous-a'n a hlawh hnem chhan pholangin minute 38-naah a khung ve leh a, goal dang lut loin chawlhlawk hman a ni a, Roy Krishna siamsak a ni.

Minute 58-naah Roy Krishna hun a her chhuak. Congo inbternational Prince Ibara chuan penalty box-ah Subhasish a ti tlu a, penalty a chawi.

Fiji captain Krishna chuan penalty hi a pet a, harsatna nei loin goal-ah a chantir. Mahse, Bengaluru an beidawng duh lo - Ibara-a'n a tihsual thup a duh a, minute 72-naah Bengaluru tan a rawn khung ve leh.

Hun tawp thlengin goal dang a lut tawh lo a, 3-3 in team pahnih an inhnehtawk - Bengaluru-in tun season-ah vawi khat chiah chak an la nei chhuznawm zel a, November 27-a Kolkata derby-a 3-0 a East Bengal an sawp hnuah Bagan an chak leh tawh lo.