LG Independence Cup an tlangzarh ta

MFA hnuaia inelna kalpui laia upa ber LG Independence Cup chu Nilaini zan khan Hotel Regency-ah India international striker Jeje Lalpekhlua'n a tlangzarh a, tie draw neih nghal niin vawiin aṭangin inelna ṭan a ni ang.

Tlangzarhna hunah hian Amit Gujral, LG chief marketing officer leh Ranjit Kumar, MD–Task Team te telin inelna hmachhawn tur team 10 aiawh te a an tel bawk.

Knockout inelna hlu
Tualchhung knockout inelna ngaihhlutah hian MPL club pariat Chhinga Veng, Aizawl FC, Chanmari FC, Mizoram Police, Ramhlun North, Bethlehem Vengthlang, Chawnpui FC leh Electric FC te an tel vek dawn.

MPL club bakah hian state pawn club chahluh ṭhin a ni a, tun ṭumah hian ISL club Jamshedpur reserve an rawn tel dawn. State pawn team pakhat zawk hi hun tep ter taka an rawn ṭhulh avangin an aiah MFA Super Cup-a khel ṭha ber Aizawl DFA hnuaia first division club Kanan FC an tel ang.

I Day Football-ah hian champion lai chu Chhinga Veng FC an ni a, anni hian season liam taa nomawi chawi theih zawng zawng an chawi vek bakah tun season-a inelna hmasa ber MFA Super Cup-ah an champion leh tawh bawk.

A bul ṭanna
I Day Football hi kum tinin neih ṭhin a ni a, kumin hi LG-in a sponsor-na hmasa ber tur a ni. MFA-in I Day Football an ngaih pawimawh ang thoin sum thawhtu LG-in inelna ṭha buatsaih an duh a, khelmual leh a chhehvel pawh an chei uluk dawn.

LG chief marketing officer Amit Gujral chuan, "Independence Cup hi kan tawpna tur a ni lo a, a bul ṭanna tur chauh a ni. Mizoram hmasawnna tura ke pen kan duh a, MFA nena thawk dunin he ram aṭang hian football star hi chhuak zel turin kan duh," tiin football hmasawnna tura ke pen tura an inpeih thu a sawi.

Inelna chungchang sawiin Amit chuan, "Mizoram chhunga football inelna a hlawhtlin lohna chhan tur hi ka hmu lo a, a hlawhtling dawn tih hi a chiang a ni," tiin a sawi.

Mizoram FA honorary secretary Lalnghinglova Hmar chuan, "Mizoram hi kan hriat ṭheuh angin ram lian a ni lo a, a mi chengte pawh an tam lo. Chuvangin football inelnaah sponsor lian kan nei thei meuh lo a, tun ṭumah hian min puih huamin LG an rawn pen chhuak a, an chungah kan lawm hle. Kan thawhhona hi la tih len theih tur a nih avangin tun ṭuma LG Independence Cup hi a hlawhtlin a ngai a, kan football club-ten theihtawp an chhuah a, mipui pawhin min hlut sak a ṭul a ni," tiin Mizo mipuite Lammual lama inkhel en turin a sawm.