Zan lamah MPL club thar Electric Veng

Mizoram Premier League club thar Electric Veng FC chuan zanin dar 7:00 hian Lammualah Aizawl FC an hmachhawn dawn.

LG Independence Cup 2018 zan inkhel hmasa ber hi Electric Veng tan MPL club an nih hnua an match hmasa ber tur a nih avangin zan chhinchhiahtlak a ni ang.

Football thiam veng?

Electric Veng hi football thiam veng tia sawi ṭhin an ni a; V. Lalruaia, Padinga (L), Pa Dawnga (L), Lalṭanpuia, Muanzova Khiangte, Hrangchhuana, Zorammawia leh keeper V. Lalmuanpuia te hunlai hre pha chuan football thiam veng an ni tih hi an pawm thlap ang.

Tun hnaiah Electric Veng chu nasa takin football-ah an tlahniam a, Mizoram chhunga football inelna sang ber MPL khelh tumin hma la

ṭhin mah se qualifier an paltlang thei lo. Veng leh veng inelnaah pawh beisei an pha ṭhin lo.

Amaherawhchu tun season-ah erawh Electric Veng tan kawl a rawn êng a, MPL club Chanmari West FC chu leiin Mizoram league sang ber an khel dawn. MPL club an nih takah chuan I Day Football an khel thei dawn a, an khingpui tur hi I League club awmchhun leh champion tawh Aizawl FC a nih avangin an bul ṭan dan hi a fuh hle.

Veng tan veng mi

Electric Veng FC-in MPL an khelh dawn takah chuan Royal Wahingdoh star hlui C.Laldinmawia a intuai thar a, midfielder duhawm Vanlalremkima'n (Tetea) a tel pui dawn bawk.

Tetea hi Aizawl FC academy leh DSK Shivajians a awm tawh a ni a, 2013 National Junior Championship-a Mizoram champion puitu zinga mi a ni. Amaherawhchu Electric Veng squad hi Aizawl FC squad elpha tur chuan an la ṭha tawk lo a, chuvangin veng mipui puihna an mamawh ang.

Electric Veng mipuiin tun hmain an veng footballer-te an beidawng ngai lo a, Independence Cup-ah pawh ṭantu nei ṭha ber zinga mi an nih ngei a rinawm. An khingpui tur I League club AFC pawh MFA Super Cup-ah an beisei ang result an neih tawh loh avangin Electric Veng lakah zahngaihna lantir an tum dawn lo.

LG Independence Cup
Lawmman
Champion Rs 1,00,000 + Trophy
Runner Up Rs 80,000
Semifinalist Rs 50,000
Fair Play Rs 30,000
Group Match
Winner Rs 2,000
Loser Rs 1,000
Draw Rs 1,500 each

Match of the Match : Match zawng zawngah thlan a ni dawn
Individual Awards
Best Player Rs 5,000
Best Forward Rs 4,000
Best Midfielder Rs 4,000
Best Defender Rs 4,000
Best Goalkeeper Rs 4,000