Brighton player manto ber Jahanbakhsh

Premier League club Brighton chuan an player manto ber ni turin Alireza Jahanbakhsh chu Dutch club AZ Alkmaar aṭangin an lalut a, Iran winger Jahanbakhsh hi pound makataduai 17 man niin kum nga daih contract a ziak a ni.

Tun nipui chhungin Brighton an inlei thar nasa hle a, kum 24 mi Jahanbakhsh an lak hma hian player thar dang pasarih an la tawh bawh. 2015 aṭang khan Jahanbakhsh hian Alkmaar tan a khel ṭan a, player pawimawh a ni phak.

Iran tana match 41 khel tawhtu hi World Cup-ah khan an ram aiawhin a feh chhuak a, Morocco leh Portugal lakah inkhel bul ṭanin, an group match hnuhnung bera Spain an hmachhawn ṭum erawhin substitute bench aṭanga luhtir a ni thung, hun tawp dawna a chance ṭha tak neih kha khung ni se la chuan knock out stage an lut hial mai thei.

Brighton boss Chris Hughton chuan, "Tlarhmaah chuan hun hran hrana a khelh theih avangin minti chak nasa zual ngei ang. Ali hi tunlai hmatawng ngaihven hlawh zingah a tel phak a, ani kan lalut thei hi a lawmawm hle a ni," tiin a sawi.

Tun nipui bazar chhunga an player lakluh zingah South African striker Percy Tau, midfielder Yves Bissouma bakah Deportivo La Coruna striker Florin Andone te an tel avangin Brighton hian tlarhma lamah duhthlan tur an ngah dawn.

Hughton-a naute hian season thar Premier League an match hmasa ber atan August 11 zan hian Watford an lenchilh ang.