Serena Williams lungawi lo a phun

Tennis world number 1 hlui Serena Williams chuan damdawi hman phal loh hman chungchangah fiahna 'test' a hmachhawn zing lutuk chu mak a ti a, amah chu an en hrang bik ni hiala a ngaih thu a sawi.

Grand Slam vawi 23 champion tawh Serena hian tun thlatir khan a lungawi loh thu hi a sawi chhuak tawh bawk, Thawhlehni khan Twitter lamah tarlang nawn lehin, "Player zingah hian test hmachhawn hnem ber ka ni mai awm e, infiamna hi thianghlim takin ka kalpui a ni," tiin a sawi.

Kum 36 mi Serena hi kumin chhung ringawtin vawi nga test a ni tawh a, US Anti-Doping Agency (USADA) chuan June 14 khan a inah an kal chilh ṭumin a lo awm lo, hemi ṭum hian Serena chuan hun tiam aia darkar 12-a hmaah endiktu lamin an tlawh niin a sawi.