Milan-ah Leonardo a kir

Brazil forward hlui Leonardo chu player a nih laia a khelhna ṭhin AC Milan-ah a kir leh ta a, tunah chuan khelmual chhunga inkhel tur ni loin general manager a ni tawh thung.

Kum 48 mi Leonardo hian 1997–2001 chhung khan Milan tan a khel ṭhin a, Italian club tan hian Serie A leh Coppa Italia nomawi a chawi sak hman a ni. Inkhelh a chawlhsan hnuah team enkawl hna a thawk zui–2009 khan Carlo Ancelotti thlakin manager a ni a, mahse a hna hi thla khat bak a thawk hman lo.

Chinese sumdawng hausa kuta an luh hnuah Milan hian indin thar tumin hma an la mek zel a, player bakah team enkawltu lam thlengin an siksawi. Season hmasa khan an player hlui Gennaro Gattuso chu coach atan an la tawh, league-ah parukna dinhmun luahin season tharah chuan Europa League an khel phak dawn.

Milan hian an la duhtawk mai lo, Arsenal chief executive Ivan Gazidis nen pawh sawi zawm mek an ni. Kum 53 mi Gazidis hian 2008 khan Gunners hi a zawm a, manager thar Unai Emery an ruat chungchanga mawhphurtu lian tak a ni.

Arsenal lam erawhin an CEO hi a chhuah loh tur thu an sawi, club chairman Sir Chips Keswick chuan, "Hmun hrang hrang aṭangin sawmna duhawm tak tak a dawng ṭhin tih kan hria, mahse a chhang ngai lem lo. Arsenal-in hma an sawn theih nan theihtawpin hna a thawk mek zel a ni," tiin a sawi.