World Cup 2018 ; Dream Team a chiang ta

Football khawvela thuneitu sang ber FIFA-in ṭum dang ang bawkin official takin team of the tournament an thlang lo a, an website www.fifa.com kaltlangin team of the tournament chu fan-te an thlan tir.

Fan-te vote thlak a nih miau avangin rin loh taka hming lang nawlh pawh an awm a, official-a thlan ni se chuan Thiago Silva, Cristiano Ronaldo leh Harry Kane te hming hi a lang kherin a rinawm loh.

Dream team-a lang zingah hian Luka Modric chu vote hmu hnem ber niin 49% vote a hmu a, Croatia captain hnaih bertu Philippe Coutinho chuan 45.6% hmuin France champion puitu Kylian Mbappe chuan 41.1% a hmu.

Tlarhnung lam

Golden Glove dawngtu Thibaut Courtois chu si ban nghak tura fan-te duh ber a ni a, Belgium-in semifinal an luhna kawnga a thawhhlawk dan ngaihtuahin Chelsea goalkeeper thlanchhuah a ni hi awm lo hran lo.

Courtois hmaa ding turin Uruguay tana ban rinawm Diego Godin, Brazil innghahna Thiago Silva leh Marcelo bakah France champion puitu Raphael Varane te thlan an ni a, an ṭha ṭhe ṭhaw hle.

Godin hian Uruguay tan match nga a khelhah clearance vawi 24 ngawt a nei a, a goal kick pet fuh percentage hi 100% a tling. Silva-a'n match nga a khelhah goal khat a khung a, khingpui ball vawi 35 ngawt a chhuhsak.

Marcelo-a'n match li a khel a, Brazil defender hian vawi thum clearance neiin pass vawi 271 a neihah vawi 230 a pass dik bawk. France champion nana player pawimawh Varane-a'n match sarihah goal khat a khung a, vawi 39 ngawt clearance neiin block vawi nga ngawt a nei bawk.

A lai an ṭha

Midfield-a player pathum inkawp tura fan-te thlanchhuah hi anni aia thlan tur bik an awm chuang lo. Coutinho-a'n Brazil chu quarterfinal bak hruai thleng zo lo mah se match nga a khelhah an player ṭangkai a ni tluan chhuak zak.

Match nga a khelhah goal hnih khungin assist vawi hnih a nei a, target ringawta shot a neih zat hi vawi sarih niin vawi 322 pass a nei a, vawi 295 a pass dik.

Premier League en ṭhin tan Kevin De Bruyne thiamzia inhrilh nawn a ngai lo. Belgian midfielder hian match ruk a khelhah goal khat khungin assist vawi hnih a nei a, vawi 344 pqass a neihah vawi 271 a pass dik a, goal khung tumin vawi 13 ngawt shot a nei.

Golden Ball dawngtu kha a ni miau a, Modric khelh ṭhat thuah inhnialna tur a awm lo. Croatia captain hian match sarih an khelhah goal hnih khungin assist vawi khat a nei a, vawi 523 ngawt pass neiin vawi 439 a ti dik a, statistics-in a pholan loh lamah team suih khawmtu leh fuih phurtu a ni bawk.

Tlarhma lam...

Golden Boot dawngtu Harry Kane-a'n match ruk khelin goal ruk a khung a, vawi 14 ngawt goal khung tumin shot a nei a, target-a a pet vawi rukah goal-ah a lut vek–a goal khung zinga pathum erawh penalty aṭanga lut a ni.

Portugal thlen chin aṭanga thlir tur a nih chuan Cristiano Ronaldo-a'n 'Dream Team' a tel a phu lo a, mimal khelh dan aṭanga thlir erawh chuan goal li a khung miau avangin tel phu loa dah a thiang lo.

Kum 33 mi forward hian match li an khelh aṭangin goal li a khung a, vawi 21 ngawt shot a nei a, vawi 112 ngawt pass a neihah vawi 93 a pass dik a, khelmuala minute 360 hun a hman chhungin kilometer 35 ngawt a tlan.

Rin lawk ang ngeiin Kylian Mbappe chu a World Cup hmasa berah 'Dream Team'-ah a tel nghal a, kum 19 mi forward hian match sarih a khelhah goal li a khung a, goal khung tuma vawi riat a petah goal zawnah vawi sarih ngawt a pet thei–Young Player of the Tournament-a thlan a ni pawh kha a awm lo hran lo.

McDonald's ve thung!

Fan-ten an duhzawng player 11 an thlang chhuak a, World Cup official sponsor zinga mi McDonald's chuan player-te statistics la khawm chungin team of the tournament an thlang ve bawk.

Dream team-a tel player, McDonald's-in statistics behchhana an thlanchhuah zingah Harry Kane, Raphael Varane, Thiago Silva, Philippe Coutinho leh Luka Modric te an lang nawn.

Player panga bakah hian Andreas Granqvist, Yerry Mina, Denis Cheryshev, Antoine Griezmann leh Eden Hazard te chu 'Dream Team' a lang phak lo, McDonald's-in a thlana lang te an ni.

Griezmann hian match sarih a khelhah goal li khungin assist vawi hnih a nei a, Cheryshev-a'n match ngaah goal li khungin Hazard chuan goal thum khungin assist vawi hnih a nei. Granqvist hi Sweden tan ban rinawm niin clearance ringawt pawh vawi 43 a nei a, Mina hi defender nichunga match thum a khelha goal thum khung thei a ni thung!