NorthEast Basketball thiam ber Mizoram ; Mizoram 85-68 Assam

71st Senior National Basketball Championships - North East Zone-ah Mizoram chuan nimin tlai khan Assam 85-68 in an hneh a, NorthEast champion an ni. January 23 - 30, 2022 hian Chennai, Tamil Nadu-ah final round khelh a ni dawn a, India hmarchhak aiawhin coach KC Lalliantluanga leh assistant coach Lalruatfela te enkawl Mizoram an tel ang.

Shillong, Meghalaya-a neih inelnaah hian hmarchhak state-te vawi khat ṭheuh an inkhel chhuak a, Mizoram hian an khingpui Tripura (124-8), Meghalaya (64-53), Nagaland (67-53), Manipur (95-64) leh Assam te an hneh vek

Mizo tan Mizo
North East Zone hi league round-a khelh a ni a, chutihrualin league match tawp bera inkhel Mizoram leh Assam te hian an khingpuite an hneh vek avangin final anga chhal theih a ni.

Kumin aṭangin zone hmangin inelna hi kalpui a ni a, ngaihhlut pawh a hlawh hle. Inelna neihna hmun St Anthony's, Shillong-ah Mizo mipui an fuankhawm a, final inkhel chhim tur hian Guwahati leh Nagaland aṭanga kalte pawh an awm.

Mipui pungkhawm hi inkhel entu an ni satliah a, Mizoram ṭantute an nih ang ngeiin team au phur turin thawm an chhuah. Mizoram team chakna hnar an ni a, chawlh laiin Krismas hlate an sa a, Shillong-a khelh a nichungin Mizoram team tan chuan mahni khawtuala khel ang mai an ni.

Final nge nge
Mizoramin India international Lalrina Renthlei hoin final-ah bul an ṭan ṭha a, first quarter-ah 23-10 a ni nghal. Matthew Remtluanga Sailo a che ṭha a, first quarter-ah point sarih nei hmanin tlarhnungah a ṭangkai hle.

Assam-in Mizoram awlsam taka chaktir an tum lo a, second quarter-ah 24-21 in an chungnung zawk. Halftime-ah 44-34 in Mizoramin hma hruai mah se nuam sain an awm thei lo, team pahnih an intluk tawk tih nemngheh nan third quarter-ah 19-19 a ni.

Hun tawp dawn hnaiah 73-68 a ni hman a, boruak a sang. Hun harsaaah Lalrina'n ṭha zetin point pawimawh a rawn nei a, Assam beiseina rawn titawpin Mizoram 85-68 in an chak.

MSL nghawng
Mizoram Super League-in rah ṭha a thlen a, MBBA-in Mizoram chhunga inelna ṭha a buatsaih zarah player ṭha zawk an rawn chhuak. Basketball-ah player sang an pawimawh a, Assam tlangval lakah Mizoram tlangvalte an te ta bik lo.

Team anga hlawhtling turin mimal angin an thawkrim a; Matthew, Michael Lalliansanga leh Dennis Lalmuanpuia ten tlarhnung an tiphui ṭha a, player-tin fitness a ṭha hle.

Assam lakah Mizoram tan Matthew (19), Lalnunpuia Renthlei (18), Lalrina (13), Michael (10), Zorinsanga (8), Vanlalṭhazuala (7), Dennis (5), Vanlalrinchhana (3) leh F. Zodinthara (2) ten point an nei a, pressure sangah Mizo player-te an buai lo.

Mizoramin rahbi thar a kai a, hma-chhawp chu India ram champion a ni - a harsa dawn. Final round-ah hian North, South, East leh West Zone aṭangin team thum an tel ang a, North East Zone aṭang erawhin champion Mizoram chauh an an tel dawn. Heng bakah hian Services, Indian Railways Team leh inelna thleng tu Tamil Nadu ten final round hi an hmachhawn ang.

Senior Men
1 Lalrina Renthlei (C) Tuikhuahtlang
2 F. Zodinthara (VC) Tuikual South
3 Vanlalṭhazuala Bungkawn
4 Zonunsanga Ramthar
5 Zonunsanga Tuikhuahtlang
6 Vanlalrinchhana Zotlang
7 Lalnunpuia Renthlei Bungkawn
8 Dennis Lalmuanpuia Dawrpui Vengthar
9 K. Lalfakzuala Mission Veng
10 R. Lalfakawma Leitan Veng, Durtlang
11 Michael Liansanga Serchhip
12 Matthew Remtluanga Sailo Zarkawt

Coaching Staff:
Manager K. Zorammuana Kolasib/Bawngkawn
Coach KC Lalliantluanga Armed Veng South
Asst. Coach Lalruatfela Dawrpui

Results
December 16, Ningani
Mizoram 124 - 8 Tripura
December 17, Zirtawpni
Meghalaya 53 - 64 Mizoram
Nagaland 53 - 67 Mizoram
December 18, Inrinni
Manipur 64 - 95 Mizoram
December 19, Pathianni
Assam 68 - 85 Mizoram

MBBA Lawmthu sawina
A hmasa berin Pathian min kaihhruaina, venhimna leh awmpuinaah lawm thu kan sawi. Kan player leh coaching staff-te chhungkua zawng zawng chungah kan lawm hle. Kan mamawh te hriaa min sponsor tute Saichhunga te unau, Dawrpui Vengthar, LB Associates Bungkawn, Samoo Dawrpui, Zote Honda, Zothan Auto works, Agri Fresh Trading Co (Silchar), Minister K. Lalrinliana leh Dr C. Daniala (NEIGHRIMS) te chungah kan lawm a, an zarah team ṭha tak kan tir thei a ni.

Mizoram hmeichhe team-in BFI hnuai inelna an hmachhawn hmasak berah chak nei lo mah se court chhunga an khelh dan a lungawi thlak a, kan chhuang hle. Mizoram mipa te NorthEast-a team ṭha ber an ni a, kan chhuang takzet. Champion theihna tura team thawhrimna leh thawhhona ṭha avangin kan lawm a, anmahni ṭawiawmtu Shillong-a Mizo awm zawng zawngte chungah kan lawm tak meuh meuh a ni. Mizoram basketball-in bung thar a kai a, Mizo basketball hmasawnna tura theihtawp chhuahtutte zawng zawng chungah lawmthu kan sawi e.