Arsenal laipui a puak ring

Hripui leng vanga Premier League club ṭhenkhat an buai laiin Arsenal an inkhel thei hram a, hri leng hre ve lo ang maiin khelmual chhungah an tal. Mikel Arteta naute hian Leeds United chu 4-1 in an luhchhuah.

Elland Road-a inkhelah Gabriel Martinelli-a'n goal hnih a khung a, chawlhlawk hmain Bukayo Saka chuan khung bawkin 3-0 in hma an hruai fal der. Penalty aṭangin Raphinha-a'n sut ṭhen ve mah se, substitute Emile Smith Rowe chuan chak a nemnghet zui leh bawk.

Rawlthar rual
Arteta-a'n tum mumal tak neiin team a din a, a rah chhuah kan hmu mek. Captain aṭanga paih Pierre-Emerick Aubameyang awm loh chhawrtu chu Martinelli a ni. Brazilian striker hian league-ah a zawnin match nga bul a ṭan ve chiah.

Leeds tlarhnung chetsual karah Martinelli hian minute 16-na lekah goal hmahruai a khung. Hliam vanga buai Leeds lamin an player ṭha chhawr theih loh an tuar a, tihsual an ngah - midfielder Granit Xhaka-a'n ball a chhuhsak chu Martinelli tan a pet zui a, khung turin harsatna a awm lo.

Marcelo Bielsa naute insiamrem hmain Saka-a'n box chhunga duh tawka ball a thunun hnuin an goal thumna a khung a, chawlhlawk hma hian Saka, Alexandre Lacazette, Thomas Partey leh Kieran Tierney te khung belh tur chu goalkeeper Illan Meslier-a'n ṭha takin a dang hram hram.

Saka, Martinelli, Martin Odegaard leh Lacazette te inkawp an hmuhnawm a, first half chhungin shot on target vawi 11 an nei hman, Opta hoin statistics mumal taka an vawn (2003-04) aṭanga chhutin chawlhlawk hma a target zawna pet hnem ber an ni hial.

Second half-ah pawh boruak a danglam teh chiam lo. Ben White-a'n penalty a chawi tih mai loh chu tihsual lian tham an nei meuh lo. An lawmna ti zualtu tur chu an academy chhuak Smith Rowe-a'n goal a khung belh zel hi a ni bawk ang.

Palina dinhmun
Nikum krismas lai khan Arsenal hi Premier League-ah 15-na an ni a, relegation zone aṭangin point thum lekin an him hram a nih kha. Thla 12 a liam a, thil tam tak chu siamṭhat a ni tawh, tun hnai kum nga a chhunga a vawi khat nan palina ni phak chungin krismas an hmang dawn.

Arteta-a'n tlarhnung remphui chu a thupui hmasa a ni a, a tir lamah an inkhel hmuhnawm tawk lo mah se a duh anga tlarhnung a rem hnuah chuan attacking lamah rilru an pe na thei a, an inkhel pawh a hmuhnawm leh ta viau.

Saka, Martinelli, Odegaard leh Smith Rowe ten an khelh ṭhat vanglai an tawng chho mek a, tawnhriat nei Lacazette-a'n a ho khawm theih bawk avangin an boruak a fuh rih hle. Chutih rualin an hneh tak kha hliamin a tih buai Leeds an nih avangin hahip a fak chiam erawh a la harsa deuh.

Kum 20 mi Martinelli chuan, "Ka sawi ve fo tawh ang khan kum naupang deuh la ni hlawm mah ila theihna kan nei. Mimal ni loin thawhhona ṭha chu kan chakna chhan a ni a, fans puihna chu kan chakna hnar a ni bawk.

"Premier League a awlsam lohzia kan hria, match zawng zawngah inthlahdah loa kan khelh a ngai dawn," a ti. Alex Oxlade-Chamberlain (2014) hnu lamah Martinelli hi Arsenal player zingah match khata goal hnih khung leh thei naupang ber a ni.

Leeds an buai
Chelsea an hneh lo a, a hnuah Manchester City lakah 7-0 ngawtin Leeds United hi an tlawm. Arsenal lakah Bielsa-a'n a player hrang hrang 10 zet chu hliam vangin a chhawr thei lo a, atan thil a awlsam lo hle - an match lehpekah Liverpool an hmachhawn dawn zui.

Premier League season ṭan nia a inlan hnuah Robin Koch chu a vawi khat nan chhawr leh a ngai a, 100% fit a la ni lo zui. Bench lamah phei chuan academy chhuak an intlar a ni ber, an zingah hian kum 15 mi Archie Gray a tel a ngai hial.

An buaina belhchhah turin minute 30-naa Jack Harrison a inhliam, a thlak turin kum 20 mi Crysencio Summerville a lo luh a ngai. Elland Road-a fans pungkhawm puihnain player ten theihtawpin an mikhual bei let mah se an tih theih chin a tlem.

Bielsa naute hian league match an hmachhawn hnuhnung pariatah vawi khat chiah hnehna an chang, tla thei china awm Burnley aiin point nga chaauhin an sang - Burnley ai hian match thumin an khel hnem zawk, insiamṭhat chu an mamawh hle.

Leeds manager Bielsa chuan, "Club ṭhenkat fans chu an team chak lai chiahin inkhel en an phur a ni mai thei, keini fans chuan kan chet chhiat lai ber pawhin min phatsan lo," a ti. Leeds fans hian an manager leh player hi an thlawp zia lantir nan an au rual a ni.