Premier League ngam loh Covid-19: Engtin nge ni zel dawn?
Football ngainatute tana kartawp nghahhlelhawmna chu Covid-19 hri lengin a ṭhiat ṭan leh ta - kartawp Premier League match 10 khelh tur awmah match ruk chu khelh theih a ni lo a, Inrinni zan khan match khat chiah a awm!
Aston Villa leh Burnley pawh Inrinni zan khan inkhel ngei tura ngaih an ni a, mahse, inkhelh hma darkar hnih vel chiah hun a la awm tihin hei pawh hi an ṭhulh thu puan a ni - ruahman angin an kal hleithei lo.
Villa hian an test result thar berah hri kai thar an neih nual avanga an inkhelh theih loh thu an sawi a, Steven Gerrard-a enkawl team hian fan-te leh an hmachhawn tur Burnley lakah ngaihdam an dil zui.
Hetiang boruak karah hian Premier League club-te chu vawiinah an inhmu khawm dawn a, Covid-19 hri leng zel kara an hmalak dan tur sawihona hun an nei dawn a ni.
Premier League club-te chauh an ni lo. Club tin coach leh captain te pawh an inhmukhawm dawn a, hri leng kara inelna kalpui zel dan tur chungchangah an ngaihdan an sawi ho ve dawn - football khawvel a buai leh ta!
Hmachhawp chu
Premier League club-te hian tun hnaia inkhel tur zawng zawng ṭhulh rih emaw, chawlh neih zawk emaw chungchang ringawt an sawi dawn lo a, inkhel tur sawn tawh ho pawh engtikah nge khelhtir a nih ang, tih thlengin ngaihtuah an mamawh.
Hei chauh a ni lo - thla thar aṭangin African Cup of Nations khelh ṭan a ni dawn a, Europe tih loh zawngah January vek khian World Cup qualifier khelh tur a awm bawk. He inelna pahnih atana an player-te kaltir chungchangah pawh English top flight league-te hian inrawnkhawm an duh.
Ram tana inlan tura player chhuahtir ringawt pawh hlawh petu club tan chuan uiawm a tling tawh a, chutiang kara Covid-19 hri kai thei dinhmuna an din reng laia chhuahtir ngat phei chu club tan a uiawm lehzual dawn.
UEFA chuan kar hmasa khan Nations League fixture a ti chhuak bawk a, hei pawh hian English club-te a nghawng buai pha - England-in June 4-ah match an nei a, Premier League final round chu May 22-ah khar a ni dawn a, May 28-ah Champions League final a awm bawk.
European football, EFL Cup semifinal leh FA Cup fifth round khelh la hmabakte nen Premier League tawp hmaa kar laihawla English club-ten match an neih loh chu vawi hnih chauh a ni dawn a, hei pawh hi tuna inkhelh sawnte fixture dah luh nan an duh - an buai takzet.
Vaccine la ru
Hri leng vanga Premier League kal zel dan tur buai karah thuneitute chuan player-te chu hri danna la ngei turin an fuih thar leh a, Premier League chief Richard Masters pawhin club-te hnenah lehkha thawnin, an player-te ṭheuh chu vaccine la tura fuih tur leh tluang taka season hman zawh theih pawimawhzia hrilh turin a ti.
Hetihlai hian coach-te pawh an ngaihdan a inang lo nuai a, Brentford boss Thomas Frank chuan December 26 hmaa match zawng zawng chawlh rih a rawt a, hetianga an tih chuan him dam taka bul an ṭan ṭhat leh thuai theih zawk a beisei.
Coach ṭhenkhat chuan Frank-a duh dan aia thui hretin rei deuh hlek chawlh rih phawt an duh a, hetihlai hian Liverpool boss Jurgen Klopp chuan chawlh neih loh hrim hrim a duh zawk thu a sawi.
Aston Villa boss Steven Gerrard chuan inhmuhkhawm an rawt chu ṭha a tih thu a sawi a, ngaihdan thawhkhawm chuan nasa takin an kal zel dan turah nghawng ṭha zawk a neih a beisei.
Ningani khan Premier League chuan a him chhung chu a rei thei ang ber an fixture kalpui zel an duh thu an lo sawi tawh a, tun ang renga match hi sawn zel a ngaih chuan sum lakluh thlengin nghawng thui tak a nei thei dawn.
Hmun dang
Spain lamah chuan La Liga player zinga 90% chuan vaccine dose hnih an la tawh a, stadium-ah pawh a khata fans an kalkhawm phal a la ni reng a, first team leh second team player dam zat belhkhawm chu 30 an tlin chuan inkhel tur sawn phal a ni ve lo.
France-ah chuan player 95% vel zetin vaccine dose hnih an la tawh a, Ligue 1-ah hian hri leng kai an tlem viau bawk. December 22 aṭanga ṭanin thlasik chawlh, kar hnih chhung an nei dawn bawk a, French league sang ber hi hri vang chuan an buai ve vak lo mai thei.
Bundesliga lamah chuan player zinga 94% vel laiin vaccine dose hnih an la tawh a, mahse, stadium-a mipui leng zat 50% aia tam fans luh phal a ni lo a, he 50% hi mi 15,000 aia an tam chuan 15,000 zawk hi rin tur a ni thung.
Bayern Munich player pawimawh Joshua Kimmich chu November khan hri a kai tih hmuhchhuah a ni a, Kimmich hian hri danna a lo la hma lo kha a inchhir thu a sawichhuah phah nghe nghe.
Premier League hnuai lam league-te pawh hri hian a nghawng hle - EFL division pathuma khelh tur league match 19 chu sawn a ni a, English Football League chuan an hnuaia club player, hmun lia ṭhena hmun khat chuan hri danna an la lak loh thu an sawi!
Eng nge an sawi?
Thuneitute chuan inkhelh dawn leh dawn loh chungchangah thutlukna an rawn siam mai ang a, mahse, a chhan tak kha keini lamin kan hriatchian ve a ngai a, kawng dap a ngai a ni. Season bul kan ṭan khan Covid hian min tihbuai leh rinna kha chu a awm vek a, hei vang hian thuneitute pawhin Plan A, B leh C thlengin an neih a rinawm a, thil lang tlang kan mamawh a ni. - Mikel Arteta, Arsenal boss
Kan vaiin kan duh a inang vek a, inkhelh zel kan duh. Buaina erawh engmah ka nei hran lo a, Premier League leh thuneitute chungah ka beiseina a sang em em bawk a ni. - Steven Gerrard, Aston Villa manager
League tihtawp lailawk hrim hrim hi ka pawm lo a ni lo a, mahse, 100% a kan hlawkpui theih tur lam a ni em, ka hre lo a ni. Tunah chawl ila kar khat emaw kar hnih emaw kan chawl ang a, game nga emaw game ruk emaw kan khel lo dawn tihna a ni. Chuti a nih si chuan engtika inkhelh nge kan duh - a nih loh pawhin a khelh mawp mawp zel theih. Mahse, player zingah pawh Covid-19 kai an awm belh zel ka ring a, a harsa a ni.
- Jurgen Klopp, Liverpool manager
Ka kuta innghat a ni lo a, mahse, eng thil pawh ti ila, a lang tlang leh kan hriatthiam theih tur hi a pawimawh ber chu a ni mai. A tir lamah ka ngaihtuah lutuk lo a, tunah chuan dan pawh ka hre ve tawh. Mahse, inkaihhruaina kha a tam lutuk a, tunah chuan ka theihnghilh leh vek tawh. - Thomas Tuchel, Chelsea boss