Highlander an chak ve leh ta

Tun season-a a vawi hnih nan NorthEast United an chak ve leh ta a, season hmang ṭha lo ber pawl East Bengal lakah 2-0 a hnehna changin point thum an hlawh chhuak.

Khalid Jamil-a enkawl team hian first half-ah goal khung lo mah se chawlhlawk hman hnuah erawh thawnthu a danglam a, Suhair Vadakkepeedika leh Patrick Flottman ten goal khat ve ve khungin an chak - hun pek belh minute hnihnaah East Bengal player Antonio Perosevic chu referee lakah mawi lo takin a che a, hnawhchhuah a ni bawk.

Guwahati club tan Rochharzela leh Lalkhawpuimawia ten inkhel bul an ṭan a, bench aṭangin R. Laldanmawia chu tlan luhtir a ni bawk - Kolkata club lamah Mizo awmchhun Lalrinliana Hnamte chuan hmun pawimawh a chang zel a, NorthEast United lakah pawh bul a ṭan a ni.

Inrinni zan khan Chennaiyin chuan 2-1 in Odisha an hneh a, Germanpreet Singh leh Mirlan Murzaev ten South Indian club tan goal khat ve ve an khung - Odisha lamin Javi Hernandez hmangin chhang ve mah se injury time-ah goal an khung chauh avangin tho leh turin hunin a daih tawh lo.

South Indian club Chennaiyin hi goal tam zawk khung thei an ni. Mahse, Vladimir Koman chu minute 84-naah tih tluk a ni a, penalty a hlawh chhuak zui. Mahse, Lukasz Gikiewicz-a'n goal-ah a chantir thei tlat lo a, a tawpah 2-1 in an chak hram.

Chennai club tan Jerry Lalrinzuala leh Lallianzuala Chhangte ten inkhel bul an ṭan ve ve a, an khel ṭha dun hle. Odisha tan Lalhrezuala Sailung, Lalruatthara, Paul Ramfangzauva ten bul an ṭan a, bench aṭangin Isak Vanlalruatfela leh JerryMawihmingthanga chu luhtir an ni bawk.

Inrinni zan inkhel dangah Hyderabad-in Joel Chianese hmangin goal hmahruai khung mah se FC Goa tan Airam Cabrera chuan a chhanglet a, hun tawp thlenga goal dang lut loin 1-1 in an inhnehtawk.