Lewandowski-a'n Muller-a record a khum

Bayern Munich-in Zirtawpni zan khan Allianz Arena-ah Wolfsburg 4-0 in an hneh a, Robert Lewandowski-a'n record an siam. Bavarians tan hian Thomas Muller, Dayot Upamecano, Leroy Sane leh Lewandowski ten goal khat ṭheuh an khung a, chak turin harsatna an tawk lo.

Bavarians striker Lewy chuan, "Wolfsburg khan goal venhim tuma tlarhnungah an inhnawh khawm avangin ka tan chuan a harsa hle. Inkhel harsa takah goal ka khung a, ka record thar hi ka chhuang em em a ni," tiin a sawi.

Kum 33 mi Lewandowski hian minute thum chiah a awm tawh tihin a volley goal a, kum 2021 chhunga league goal 43 a khungna niin kum khat (calendar year) chhunga Bundesliga-a goal khung tam ber record a siam.

Bayern legend Muller hian kum 1972 khan kum khat chhungin goal 42 a khung a, kum 49 hnuah Lewy-a'n a rawn khum chauh. Polish striker hian record khum tur hian match 34 chauh a mamawh a ni.

Season liam ta khan Lewan-dowski hian Bundesliga-ah goal 41 a khung a, season khata goal khung tam ber record Muller-a siam chu a lo khum tawh bawk.

Lewandowski hian Bundes-liga-ah goal 296 a khung tawh a, Muller-a record goal 365 khum turin goal 69 a la mamawh. Polish striker hian 2022-23 season thleng contract a la nei a, tuna a goal khung chhoh dan thlir chuan record thar siam leh thei tura ngaih a ni.

Bundesliga-ah Bayern Munich an chungnung a, match 17 aṭanga point 43 hmuin hmahruaitu an la ni. Lewy hian tun season match zawng zawng la khel kim vekin goal 19 a khung tawh a, top scorer a ni mek.