Nations League-ah Brazil leh Argentina

UEFA-in ram inelnain ngaihhlut a hlawh theih nan Nations League an buatsaih a, season hnih khel zo tawhin tih changtlun dan an ngaihtuah zel.

UEFA vice president Zbigniew Boniek chuan kum 2024-ah chuan Nations League inelnaah South America ramte an tel tur thu a sawi a, hei hi a thleng tak tak a nih chuan FIFA-in kum hnih dana World Cup buatsaih a tum elpui tur a ni ang.

UEFA leh CONMEBOL te chuan FIFA-in kum hnih dana World Cup buatsaih a tum hi na takin an do a, kar liam ta khan Nations League chungchangah inremna kum 2028 thleng daih contract an ziak.

Nakkum June 1 hian European champion Italy leh Copa America champion Argentina te hi London-ah an inkhel dawn a, inelna hming hi Finalissima tih a ni ang.

UEFA aiawh thupuangtu chuan, "UEFA chuan CONMEBOL nena thawhho dan tur kawng hrang hrang an duang a, chung zingah chuan Nations League pawh a tel. Engmah tihchian a la ni lo," tiin thu chiang a la awm thu a sawi thung.