Team nem Elche lakah Barca chak hram

Barcelona-in point thum an mamawh a, minute 90 an inkhelh hnua an hlawhchhuah chu point thum a ni. Mahse, an mikhual Elche lakah 3-2 a chak turin vanneihna an mamawh tel a, an lawm a kim lo ang.

Catalan club tan Ferran Jutgla leh Gavi ten minute 20 hmaa goal hnih an khung hman avangin Barca hi awlsam takin an chak dawn niin a lang hman a, mahse, Elche hian Tete Morente leh Pere Milla hmangin si phurh an rawn sut!

Nou Camp-ah Xavi hoin Barcelona an chak zo lo mai dawn niin a lang hman a, mahse, Nico Gonzalez chuan hun tawp nan minute nga chiah a awm tawh tihah goal a rawn khung ve leh a, 3-2 in an chak.

Hetihlai hian Atlético Madrid an che fuh hleithei lo a, khualmualah Champions League khel tura an elpui Sevilla lakah 2-1 in an tlawm - top four aṭangin an chhuak leh ta rih.

Rawlthar duhawm
Player inhliam a neih nual avangin Xavi-a'n kum naupang lam a hawi a, Nou Camp-a inkhel ṭantir lam boruak thlir chuan a tisual dawn lo niin a lang - minute 16-na lekah nipui transfer-a Barca B team tana lakluh Jutglà chuan goal hmahruai a rawn khung.

Kum 22 mi forward hian inkhel ṭan aṭanga second 90-na lekah goal a khung niah a inngai a, mahse, offside vangin pawmsak a ni lo. Catalan club senior team tana a goal hmasa ber khung tur hian rei a nghah erawh a ngai lo a, Ousmane Dembele-a corner aṭanga ball kal chu hmahruaina goal ni turin a tauh lut ta tho a ni.

Minute thum a liam hman lo. Barcelona tan rawlthar duhawm Gavi a inlar a, amah thawhrah liau liau hmangin mawi zetin an goal hnihna a khung - kum 17 mi Gavi-a'n Barcelona tana a goal hmasa ber a ni a, amah chhertu club tana a goal hmasa ber khung danah a lungawi khawp ang.

Kum 17 mi lek ni chunga Spain tan pawha vawi li lai khel tawh Gavi hian tun season inelna hrang hrangah match 21 khelin goal khat a khung a, assist vawi thum a nei - Barca-in lawmna tur an neih tlem season-ah an tan lawmna thlentu langsar a ni.

Tete-a vang!
Barca-in goal hnih khung chungin chawlhlawk an hmang a, mahni muala inkhel an nih bawk avangin Elche tan beisei tur a tlem - mahse, relegate hlauhthawnawm dinhmuna ding club hian Barca lakah chak an tum ngam a, an beidawng lo.

Minute 62-na lekah bench aṭanga luhtir Tete Morente chuan si phurh a rawn sut ṭhen a, a la tawp lo cheu - Barca an insiamṭha hman lo. Minute khat pawh a liam fel hmain Pere Milla chuan a khung ve leh a, 2-2 a ni der.

Elche boss Francisco Rodríguez-a'n substitution a siam sual lo tih a lang a, an si phurh rawn suttu pahnih hi second half-a bench aṭanga a luhtir ve ve an ni. Mahse, Barca an lo beidawng bik lo - bench aṭang veka luhtir Nico Gonzalez chuan minute 85-naah goal a rawn khung leh a, mipui puihna nena khel Barca khelmuala goal dang khung turin Elche tan a harsa tawh a, Barca an chak.

Barca-in hnehna an chang vangin match 17 an khelh tawhah point 27 an nei mek a, palina Rayo Vallecano aia match khata khel tlem chungin point thum chiahin an phak lo - Europe beiseina a nung thar ang.

Atletico pawh chu...
La Liga champion lai Atletico Madrid tan an nomawi kawl lai humhim tur chuan thilmak a thlen a ngai tawh - an mikhualna ramah Sevilla an ngam lo a, match 17 aṭanga point 29 chiah an neih avangin hmahruaitu Real Madrid nen an inthlau ta hle.

Sevilla tan Ivan Rakitic chuan minute sarihna lekah goal hmahruai a khung a, mahse, Madrid khaw club-in hnufual rei lutuk duh loin minute 33-naah Felipe hmangin si phurh an sut a, beiseina thar an insiam.

Mahse, Atletico-in Sevilla goal rum ṭhaih fo mah se a pawimawh ber goal an khung thei lo a, mualneitu Sevilla bawkin an khung - hun tawp nan minute hnih chiah a awm tawh tihah Lucas Ocampos chuan goal a khung a, Atletico tan chhanletna hun a awm tawh lo.

Julen Lopetegui enkawl Sevilla-in hnehna an chan avangin champion beiseina an chhi nung zel a, hmahruaitu Real nen khelh zat inangah point nga chiahin an inthlau - nizan Real inkhel result a zirin an inthlauhna hi a danglam leh ang.