Mohun Bagan leh Habas inṭhen

Indian Super League club ATK Mohun Bagan chuan an coach Antonio Lopez Habas nen an inṭhen thu an puang a, Valencia boss hlui hmun ruak luah tur hian assistant coach Manuel Cascallana chu tun season tawp thlengin an ring phawt ang.

Kum 1997-a Copa América final-a Bolivia hruai thleng theitu coach hi ISL-a vawi hnih champion thei hmasa ber a ni a, kum 2014 khan ATK chu ISL nomawi hmasa ber a chawipui. Kum 2020-ah ATK Mohun Bagan a champion pui leh a, season hmasa khan final an khel bawk.

Mahse, tun season-ah Kolkata club an che hleithei lo. League match ruk an khelh tawh aṭangin vawi hnih chiah an la chak a, vawi hnih tlawmin vawi hnih erawh chu an khingpui an inhnehtawkpui thung.

Khawvel huap pawha sumdawng hausa tawntaw RPSG Group ta an nih avangin Bagan hian sum sen tur an nei a, a sen pawh an inseng nasa - hei vang hian an beisei ang result neih loh chuan coach-in a tawrh mai hi a rinawm sa.

Kum 64 mi coach hi a vanduaina zawn thlirsak erawh chuan vanduaina a nei. Tlarhnunga a rinrawl Sandesh Jhingan chuan Croatian club Sibenik a zawmsan a, defender ṭangkai Tiri chuan hliam vangin tun season-ah match hnih chiah a la khel bawk.

Mahse, Bagan a enkawl miau avangin Habas-a tan pressure a sang lo thei lo a, a tawpah chuan an duh ang result a pek loh avangin a hna aṭanga chhawk hial a ngai ta.

Kolkata club hian Habas-a hnuaia an match hmasa ber chu December 16 zan khan an khel a, Bengaluru nen 3-3 in an inhnehtawk - Cascallana hnuaia an match hmasa ber chu Thawhlehni zanah an khel dawn a, NorthEast United an hmachhawn ang.