Inter Milan an kal fal

Serie A champion lai Inter Milan chuan hma an hruai fal leh ta. Nerazzurri hian Salernitana chu 5-0 ngawtin an sawp a, match 18 aṭanga point 43 hmuin table chung berah an awm chhunzawm.

Inrinni zan inkhelah Inter tan hian Ivan Perisic, Denzel Dumfries, Alexis Sanchez, Lautaro Martinez leh Roberto Gagliardini ten a khat mawi tawkin goal khat ṭheuh an inkhung chhawk a, nuamsa takin point thum an hlawh chhuak.

Simone Inzaghi naute hian an match hnuhnung zawkah Cagliari chu 4-0 in an lo sawp tawh bawk a, an match hnuhnung pahnihah goal kua khungin anmahni lamah goal a lut ve miah lo - thlasik chawlh hmain hun an hmang ṭha takzet.

Inkhel dangah AS Roma chuan anmahni aia team ṭha zawk Atalanta chu 4-1 ngawtin an luhchhuah. Roma striker Tammy Abraham-a'n goal hnih a khung bakah midfielder Nicolo Zaniolo leh Chris Smalling ten an khung ve bawk.

Jose Mourinho-a'n tun hnaiah a naute khelh dan a duhkhawp loh thu a sawi fo a, a duhthusam ang vek la ni lo mah se an insiamṭha thawkhat tawh tih a lang. Point 31 hmuin pangana an ni mek, palina Napoli an phak lohna chu point nga chauh a ni.

Juventus pawhin hma an sawn ve hret. Old Lady hian Alvaro Morata leh Juan Cuadrado te goal hmangin Bologna 2-0 in an hneh a, point 31 hmuin parukna dinhmun an luah ve leh ta bawk.