Police hmaah MPL kai thar Chawnpui

LG Independence Cup 2018-ah Mizoram Police chuan vawiin tlai dar 2:00 hian Lammualah MPL kai thar Chawnpui FC an hmachhawn dawn.

2012 I Day Football champion Police leh Chawnpui hi Group B-ah champion lai Chhinga Veng, Kanan FC leh Jamshedpur FC Reserve nen an awm ho a, he group-ah hian league pathum MPL, ISL leh Aizawl DFA first division club te an awm tihna a ni.

Hman leh tun
Mizoram Police-in I Day Football nomawi an chawi hnuhnun ber chu kum 2012-ah khan a ni a, khami ṭuma starting eleven chang zingah Lalrinchhana (Itana), V. Lalṭanpuia, Lalfakzuala, Lalbiakhlua leh F. Lalrinpuia te an la awm.

Heng player-te hi an la ṭha reng a, chutihrualin captain Sama Hnamte hmunruak luah khat thei erawh an awm bik lo tih te pawhin a sawi theih. Lammual ngeia National Under 16-a Mizoram champion puitu Sama Hnamte awm loh hnuah Police hian inelna lianah nomawi an chawi leh tawh lo a, MPL aṭanga an tlak thlak laia Aizawl DFA hnuaia first division nomawi an chawi erawh chhuan pui tham a tling lo.

Police result neih ṭhat loh chhan hi recruitment an neih khat vang a ni a, kuminah nei mah se kumin inelnaah erawh an player thar nikum I Day Football-a best player R. Malsawmltuanga leh top scorer Malsawmfela te an la chhawr thei dawn lo. An squad chhah tawk loh avangin Police hi champion thei ni mah se champion rinkai an ni pha lo ang.

Chawnpui hi le...
Mizoram Premier League kai thar Chawnpui FC-in MFA Super Cup-ah beisei an pha lo a, MPL club an nih hnua an match hmasa berah Aizawl FC Academy chu penalty shootout-ah an hneh lo. Amaherawhchu hetah hian chhut uluk a ngai ta chiah, coach Lalremtluanga kaihhruai team hi first round-ah tla mah se hun pangngaiah hneh loh an la tawng lo.

Chawnpui tan Mizoram Police hneh chu harsa dawn mah se point hmuh hrim hrim erawh thil theih a ni a, defensive game khel thiam Remtluanga'n Police tan harsatna a siam thei ang.

MPL kaithar hian tualchhung league sang bera tawnhriat nei tawh Lalbiaknia, Vanlalthanga, Lalruatfela, Lalramliana, Israel Laldingngheta, Vanrammawia Ngente leh Jerry F.Zonunsanga te an kawl a, tawh an khirh viau tura ngaih a ni.

En Man Free
1) School naupang uniform ha leh College/Student ID nei tan inkhel hi a thlawnin a en a theih.
2) Mi nawlpui tana inkhel en man hi Rs 30 a ni.