Sir Alex-a'n lawmthu a sawi

Manchester United manager hlui Sir Alex Ferguson chuan amah engkawltu damdawi in thawktute chungah lawmthu a sawi.

Manager ropui Sir Alex hi May 5, Inrinni zan khan thluaka thisen zam chat vangin hmahmawh taka zai a ni a, hun engemawti chhung chu Salford Royal Hospital-a intensive care unit (ICU) ah enkawl chhunzawm a ni.

United manager hlui chuan, "Khawvel hmun hrang hrang aṭangin duhsakna ka dawng a, ka beisei phak bak a ni a, chakna nasa tak min pe a ni. Macclesfield, Salford Royal leh Alexandra hospital-a hna thawktute chungah lawm takzet. Anni chu awm lo se tun hunah hian inhmaah thu ka sawi thei lo ang. Kei leh ka chhungte kan lawm hle," tiin a sawi.

Ferguson chuan sawi chhunzawmin, "Tun season-ah pawh inkhel en leh theih ngei ka inbeisei a, Jose Mourinho leh a hote tan duhsakna ka hlan," tiin Manchester United inkhel en ngei a tum thu a sawi.

Sir Alex hian May 2013 khan manager hna a kalsan a, kum 25 chhung English club a enkawl chhungi nomawi 38 a chawi hman. British football-a manager hlawhtling ber niin Premier League nomawi vawi 13, Champions League nomawi pahnih, FA Cup panga leh League Cup pali a chawi a ni.