Chanmari FC-in chakin bul an ṭan

28th July, 2018

LG Independence Cup 2018-a match hmasa berah Chanmari FC-in nimin tlai khan Bethlehem Vengthlang FC 2-0 in an hneh.

Lammuala inkhelah hian Chanmari FC tan Laldampuia leh substitute Lalrammuana ten goal an khung.

Group A-ah hian Chanmari leh BVT bakah Aizawl FC, Electric Veng FC leh Ramhlun North te an awm a, nizan khan I League club AFC leh MPL kai thar EFC te an inkhel a, result kan hre hman lo.

Goal khat phawt
Chanmari FC-in bul an ṭan ṭha a, Dampuia hmangin minute khatna lekah goal an khung teuh nghal hle. Amaherawhchu, BVT an insiamrem a, team nem zawk niin lang mah se Chanmari lakah inkhel an thunun zawk.

Minute 29-naah team ṭha danglamna a lang a, Lalmuanzova ball pek chu dinglam aṭanga over lapping latu Thomas Lalengkima chuan a lakluh hnuah goal-ah a pet a, BVT keeper Eddie Zorammawia'n dang hman loin goal ban a per a, Dampuia'n he mi per hi nang fuh hmasa berin Chanmari 1-0 in hma an hruai.

BVT an vanduai
Bethlehem Vengthlang lamin si phurh sut theihna hun ṭha an nei a, subsitute Ellis H. Zothansanga'n Chanmari keeper MS.Dawngliana chiah a hmachhawn hnuah a khung lo. Keeper MS-a hian BVT player Jonathan H. Lalhriatkima goal khung tur a dan sak bawk.

Chanmari defender C. Lalrosanga'n keeper MS-a tihsual vanga ball clear a tumna lamah goal ban a pet per bawk a, BVT an vanduai. Chutihrualin Lalruatsanga Sailo (Tawia) hote an dawhthei a, man of the match-a thlan defender R. Lalawmpuia (Mapuia) khel ṭha bawkin a vuak let hunah chiah an tih tur an hre hlawm bawk.

Injury time-ah BVT corner hmuh chu Chanmari zawkin an hmang ṭangkai a, Lalmuanzova'n midfield aṭanga a ball hmuh chu substitute Lalrammuana a pe a, Shillong Lajong player hlui hian chak nemngheh nan a hmang.

Engtin zel?
Chanmari FC hian Thawhlehni tlaiah Electric FC an hmachhawn ang a, zan lamah BVT leh Ramhlun North te an hmachhawn ang.

I Day Football-ah hian team 10 te chu group hnihah panga ve ve in ṭhenhran an ni a, group khat aṭangin a sang pahnihin semifinal an lut ang a. Point inang an awm a nih chuan head to head en tur a ni.