Barcelona B nena inkhel tur Bengaluru

Indian Super League runners-up Bengaluru FC chuan pre season tour nei turin Spain an pan dawn a, friendly match an khelhpui tur zingah Barcelona B leh Villarreal B team an tel.

Bengaluru hian nimin khan Spain-a pre season an neih tur chungchang hi social media kaltlangin an puang a, Spanish club lian reserve team pahnih bakah hian 2015 AFC Champions League runners-up Shabab Al Ahli Dubai FC leh Spanish second division club Atletico Saguntino te chu friendly match an khelhpui bawk ang.

Spanish coach Carles Cuadrat enkawlna hnuaia khel tur Bengaluru hian an club innghahna hmun Bellary-ah ni 10 chhung training an nei leh der tawh a, Spain-ah hian Valencia khawpuia Masia La Grava-ah training an nei dawn.

Bengaluru coach Cuadrat chuan, "Pre season tour ṭha tak kan nei dawn niin kan hria a, kan phur tawh hle. Barcelona B leh Villarreal B hi Xavi, Iniesta leh Santi Cazorla te lo chher chhuak tawhtu an nih avangin kan tan chuan inzirna ṭha tak a ni dawn a ni," tiin a sawi.