LDFA Super Cup champion Chanmari FC
Lunglei District FA hnuaia inelna lian pakhat LDFA Super Cup vawi khatna chu nimin khan khelh zawh a ni a, final inkhel hmuhnawm takah Chanmari FC chuan Ramthar FC lakah 4-1 a hnehna changin champion hmasa ber an ni.
Ṭhuamluaia Mualah inkhel ṭan tir lamah Ramthar hlauhawm zawkin, J. Lalduhawma hmangin minute 11-na lekah goal hmahruai an khung. Mahse, he goal hian Chanmari a chhaih kawlh niin a ngaih theih, Samuel Lalramchhana (30'), HK Lalhruaitluanga (48'), PC Lalruatpuia (55') leh Ramdinpuia (90+5') te hmangin an chhang let.
Lunglei CFC an ṭha
Chanmari FC hi LDFA hnuaia second division club niin kuminah hmasawn tumin nasa takin hma an la, player ṭha leh beisei awm rual la khawmin, an player tam zawk hi Inter District U19 a Lunglei District aiawh tura thlan chhuahte an ni.
Zo United pawh lo enkawl tawh coach tawnhriat nei ṭha Lalrozara Fanai kaihhruaina hnuaiah nikum khan Inter District U19 champion an ni a, tun ṭumah pawh hian team ṭha ber an ni zui leh thei a. Super Cup-a an match hmasa berah Lunglei Super League leh I Day Tournament champion lai Bazarveng FC 5-1 in an sawp!
Chanmari FC midfielder ṭha Samuel Lalramchhana a hmuhnawm a, Bazarveng tlangval hian match li a khelhah goal khung kim vekin, final-a an siphurh sutna goal pawh a khung. Ani bakah hian tlarhma lama CS Rorelliana leh H. Lalramzauva te inkawp chu team dang tan dan theih an ni lo.
Goal venhim khawngah defensive midfielder PC Lalruatpuia'n tha a thawk hlawk a, Mualṭhuam Nortlh tlangval hi SYS Football Academy chhuak niin nikum khan Mizoram tan Subroto Cup a khel a, tun ṭumah hian best player atan thlan niin an champion theih nan a ṭangkai hle.
Rozara naute hian inelna neih chhung hian final thleng turin LSL club pathum hnehin goal kua an khung thei a, nomawi a inchuh pui Ramthar lakah goal li ngawt an khung zui theih avangin LDFA Super Cup team ṭha ber an ni.
Ramthar an zuih
Champion zo lo mah se Ramthar FC hian tun season-ah beisei an nei thei ang. Tun tourney chhunga goal ruk khungtu winger J Lalduhawma goal khung hum zo lo mah se an hmatawng hi a hmuhnawm a, midfield khaikhawmtu Vanlalruatpuia leh Laldinsanga te inkawp pawh an khelh ṭhat ni chuan dan an harsa - Chanmari laka an fuh tawk lo erawh inenfiah an ngai ang.
Ramthar FC hian an match hmasa lamah Chuauhranga FC, Zotlang FC leh Rahsiveng FC an hneh thei a, final lut tura an goal khung pariat zinga goal nga chu Lalduhawm khung a ni, Duhawma hian final-ah pawh goal khung thei mah se thlawp tu a nei ṭha tawk lo a, an tlarhnung a pawp bawk.