Kum dang aiin a harsa - Hamilton
Formula 1 driver champion lai Lewis Hamilton chuan season dang zawng aiin nomawi inchuha inelna chu a hautak zawka a hriat thu a sawi a, tunkar tawpa inelna an neih turah hnehna chan a pawimawh thu a sawi tel bawk.
Pathianni zan dar 6:40 hian Hungaroring tlan kawngah Hungarian Grand Prix an tlan dawn a, team ṭha pahnih Mercedes leh Ferrari bakah Red Bull te chu inel langsar leh ber tura ngaih an ni ang.
Intlansiak hnuhnung ber German GP-ah khawtual tlangval Sebastian Vettel a chesual a, dinhmun hnung tak aṭanga bul ṭan chunga hnehna chang thei Hamilton-a'n ropuina a hlawh phah thung - British driver hian Vettel lehpelin championship-ah point 17 ngawtin hma a hruai fal phah a ni.
World champion vawi li ni tawh Hamilton chuan, "A nihna takah chuan boruak a sang lo tih rual a ni lo. Sebastian leh ka lakah hian team lam min beiseina pawh a sawt hle a, tun hma zawng ai khan inelna a huatak in a khirhkhan zawk a ni.
"Chutihrualin kei chuan boruak a san zawh poh leh nuam ka ti a, hetiang thil hian min ti buai ve mai mai ngai lo. Season liam ta khan boruak a sang tawh a, kumin hian a khum chho leh. Tihsual pakhat chauh kan nei a nih pawhin kan elpui ten min tlan pel duai zel," tiin a sawi.