Premier League Manager aṭangin head coach

Premier League-ah club enkawltute chu 'manager' tia koh an ni ṭhin a, tun hnaiah 'head coach' nihna pek an awm zeuh zeuh bawk a, tam takin club enkawltute 'nihna' hi hriatthiam an harsat fo.

Mizoramah chuan club enkawltute chu 'head coach' tia koh an ni tlangpui a, a hranpain manager an awm leh ṭhin–hei hi national football team kalphung a ni a, Premier League club ten an seng lut ṭan mek bawk.

Arsenal coach chhuak ta Arsene Wenger kha coach leh manager tia koh kawp a ni ṭhin a, amah thlaktu Unai Emery erawh 'head coach' tih a ni ta thung.

Premier League-ah club 20 an awm a, heng zinga club 14 hian an club enkawltu ber chu 'manager' nihna an pe a, a bak parukin 'head coach' tiin an nihna hi an tarlang thung. Zawhna lo piang ta chu 'coach leh manager danglamna hi enge?' tih a ni.

Coach vs Manager

Chelsea boss chhuak ta Antonio Conte kha 'head coach' tiin London club hian a nihna an record sak a, amah thlaktu Maurizio Sarri pawh head coach tia tarlan a ni bawk.

Head coach ti chauha koh an nih chuan club transfer leh a kaihhnawih thil dangah mawhphurhna an nei tel lo tihna a ni a, manager an nih erawh chuan club-a player lut leh chhuak thlengin thutawp siamtu ber an ni.

Hrilhfiah dan awlsam berah chuan 'manager' tia koh an nih hian khelmual pawn lam thlengin thu an nei a, coach an nih erawh chuan player lut leh chhuakah pawh 'rawn' tur zingah an tel ve chauh.

Antonio Conte khan Blues player lut leh chhuakah thuneihna a neih loh avangin a tan hnathawh a harsat thu a sawi a, a hna chu club thuneitu lamin an pek ang apiang lo hman a nih avangin a tan hna a harsat thu a sawi.

Ngaihdan dang...

Conte-a'n manager ni loa head coach chauh nih a buaithlak thu sawi mah se a hmun ruak luahtu Sarri erawh a buai ve lo. Napoli boss chuan, "Transfer market hi ka tuina a ni ve lo," tiin a sawi a, an pek apiang a ṭha thei ang bera chhawr tura ruahmanna siam chu a hahdamthlak zawkah a ngai.

Kum 2016 khan Tottenham Hotspur boss Mauricio Pochettino-a'n Spurs enkawl chhunzawm zel turin contract thar a ziak a, an inremnaa tel pakhat chu head coach aṭanga manager tia a nihna thlak kha a ni.

Argentine manager hian khelmual chhungah chauh ni lo transfer bazar thlenga thutawp siamtu nih a duh a, "Club leh keima tan pawh a ṭha ber turah kan ngai a ni," tiin an thutlukna a sawifiah.

Tun hnaia coach leh manager nihna inthlak danglam zirchiangtu, Manchester United defender hlui Gary Neville chuan, "Result ṭha a awm lohin manager an thlak zung zung a, hei vang hian club-a a ngheta ṭhu, transfer buaipuitu an awm a ngai a ni," a ti.

Buaipuitu chu

Head coach chu khelmual lama insawrbing tura beisei an ni a, zawhna awm chu tu berin nge transfer chungchang chu lo buaipui ta, tih hi a ni a, a chhanna chu club enkawltu a zirin a danglam thei tih a ni thung.

Club-te hian director of football emaw sporting director an nei vek a, anni hi transfer buaipuitu leh player thlithlai tu ber an ni tlangpui. Hetihrual hian club neitute chu thutlukna siamtu ber an nihna hmun pawh a awm tho.

Emery-a'n head coach dinhmun a chelh avangin Wenger-a'n a duh zawng apiang a lei theih anga zalenna a nei lo a, Barcelona director of football hlui Raul Sanllehi chu Gunners-ah hian head of football relations niin ani hi transfer chungchanga thutawp siamtu a ni–Mikel Arteta khan head coach ni loa manager nih a duh avangin Gunners boss ni tura an inbiakna kha a tlang lo.

Jurgen Klopp, Pep Guardiola leh Jose Mourinho ten an duh zawng player an lei laiin Sarri leh Emery-te chuan an pu ten an pek apiang chhawr thiam dan tur an lo zir thung.