Magpies-ah Japanese striker lut dawn

Newcastle United chuan Japanese striker Yoshinori Muto lalut turin German club Mainz chu inremna an neihpui a, kum 26 mi hi pound maktaduai 9.5-in an lalut ang.

FC Tokyo aṭanga in zir chhuak striker hian season hman zawh takah khan Mainz tan inelna hrang hrangah match 30 khelin goal 10 a khung a, Russia World Cup-ah hruai ni mah se match khatah chiah a inlan thung.

Newcastle hian Switzerland defender Fabian Schar chu Deportivo La Coruna aṭangin pound maktaduai thumin an lalut bawk a, kum thum chhung atan contract an ziahpui.

Kum 26 mi centre back hian Switzerland tan match 42 khelin World Cup group stage-a an match zawng zawngah inkhel bul a ṭan vek a, tawnhriat ngah tak player a nih avangin Magpies-in man tlawm taka an lalut thei hi an vannei hle.