Smith Rowe goal mawi a tawk lo

Arsenal rawlthar Emile Smith Rowe-a'n Atletico Madrid lakah goal mawi khungin an siphurh a sut a, hun tawp hnua langsar zawk erawh penalty vawi thum a dan baka chakna goal chhuih luttu Atletico Madrid goalkeeper Antonio Adan a ni.

Ningani khan Singapore-ah Arsenal leh Atletico ten season thar inbuatsaih nan International Champions Cup an khel a, Spanish club tan Luciano Vietto chuan chawlhlawk hma hretin goal hmahruai a khung.

Second half ṭan tirah kum 17 mi Smith Rowe chuan Atletico Madrid player hual vel karah ṭha zeta ball a tlanpui hnuin, defender pahnih a paltlang hnuah Gunners academy chhuak hian box pawn aṭangin mawi zetin a thlawh lut; 1-1 in hun a tawp.

Penalty shootout-ah Atletico Madrid goalkeeper Antonio Adan chuan Henrikh Mkhitaryan, Joseph Willock leh Edward Nketiah te pet a dan bakah an chakna goal a pet lut.

Europa League champion hian World Cup khelh vangin an player pawimawh Antoine Griezmann, Diego Godin leh Diego Costa te an la chhawr lo a, Arsenal tan Mesut Ozil-a'n training zawm tawh mah se a la inlan lo bawk.

Unai Emery naute hi Inrinni tlai dar 5:00-ah Paris St-Germain nen an in hmachhawn leh dawn a, July 30-ah Atletico leh Ligue 1 champion PSG te an innuai chhunzawm ve leh bawk ang.

Inlante:
Arsenal: Leno, Bellerin, Mustafi, Holding, Kolasinac, Ramsey, Guendouzi, Nelson, Smith Rowe, Aubameyang, Lacazette.

Subs used: Cech, Sokratis, Mkhitaryan, Maitland-Niles, Chambers, Mavropanos, Perez, Nketiah, Osei-Tutu, Willock.

Atletico Madrid: Oblak, Juanfran, Moya, Montero, Olabe, Correa, Rodri, Thomas, J Munoz, Gameiro, Vietto.

Subs used: Adan, Garces, Solano, Punal, Rodriguez, C Munoz, Mollejo, Carro, Pinchi.