Spurs leh Reds inhnehtawk; inkhel boruak a 'hot'

Covid-19 vangin kartawp inkhel tur tam tak ṭhulh ni mah se Pathianni zana inkhelah football tihmuhnawmtu chu a thleng kim vek - Tottenham Hotspur leh an mikhual Liverpool te 2-2 in an inhnehtawk a, inkhel a hmuhnawm takzet.

Team pahnihin hma an inhruai chhawk a, red card hmuh tur a awm a, referee thutlukna sawisel theih tak a awm bawk - heng zawng zawng hi fans lam tan chuan inkhel hmuhnawmna belhchhahtu a ni a, Pathianni zana he inkhel en ve lote in vanduai!

Tottenham Hotspur Stadium-ah Spurs-in Harry Kane-a goal hmangin hma an hruai hmasa a, Liverpool-in Diogo Jota leh Andy Robertson hmanga chhangletin hma an hruai ve leh a, mahse, Son Heung-Min-a'n a khung ve leh avangin 2-2 in an ṭin.

Liverpool defender Andy Robertson chu a chet dan hlauhawm tak avangin hnawhchhuah a ni a, mahse, hei aia hlauhawm zawk maha foul Kane hnawhchhuah a nih ve loh avangin Liverpool an lungawi lo.

Cho leh cho
Spurs khelmualah team pahnih an inhlau lo tawn a, Antonio Conte enkawl Spurs an danglam tawh tih hmuh turin a awm - minute 13-na lekah Kane chuan goal hmahruai a rawn khung a, thawm chu ṭha tak a ni.

Nipui laia Manchester City pan a tum hnua ngai awh leh tawh lo Kane-a'n goal a khung leh ta a, tun season Premier League match an khelmuala an khelha a goal hmasa ber a ni - league match 14-ah goal hnih a khung ve ta!

Mahse, Liverpool an beidawng duh bik lo. Jota chuan minute 35-naah Robertson-a siamsak chu si phurh sutna goal atan a khung a, Spurs khelmualah fans an ngawi a, goal dang awm loin chawlhlawk hman a ni.

Liverpool tan inkhel ṭantir lama chance duhawm tak hlahtu Robertson-a'n a tihsual thup nan goal a khung ve leh a, Trent Alexander-Arnold a siamsak a ni.

A rei lo
Premier League match ruk zet a zawna chak tawh Liverpool-in hnehna an chang leh mai dawna ngaihna a lian hman a, mahse, Conte enkawl Spurs rilru puthmang a danglam tawh - chak an duh.

Spurs-in goal an chhuah aṭanga minute nganaah Liverpool keeper Alisson a chesual zui a, South Korean forward ṭha mi Son chuan hei hi remchangah lain an si phurh a rawn sut.

Liverpool an talbuai zui. Goal leh assist neitu Robertson-a'n neih tel kher ṭul lo pakhat a hmuh belh a, minute 77-naah Emerson Royal laka hlauhawm taka a chet avangin hnawhchhuah a ni.

Goal dang lut loin inkhel a tawp a, Liverpool inkhelh apianga a hming lam tel ngai ṭhin Mohamed Salah chu match 15 hnua a vawi khat nan league match-a goal an khungah a inrawlh lo - Spurs in an dang chat.

Reds buaina
Liverpool-in Covid-19 positive vangin an player langsar ṭhah Virgil van Dijk, Fabinho leh Thiago Alcantara an chhawr thei lo a, damlohna avangin Jordan Henderson a inlan thei lo bawk.

Covid-19 vanga inkhel sawn tlai leh ṭhin duh lotu Jurgen Klopp-a'n midfield-ah Tyler Morton a chhawr a ṭul a, kum 19 mi rawlthar duhawm tan Premier League-a inkhel bul a ṭan hmasak ber a ni.

Morton hi midfield-ah James Milner nen an inkawp a, Milner-a'n kum 2002-a a league match hmasa ber a khelh khan ni 10 lek mi a ni - minute 60-naah Roberto Firmino chuan a thlak.

Liverpool-in hnehna chang zo lo mah se table-ah pahnihna an nih chhunzawm zel a, hmahruaitu Manchester City an phak lohna erawh match 18 ve ve khelh tawhah point thum a tling ta.

Thil thlen dan
13 mins: Harry Kane-a'n Spurs tan goal hmahruai a khung.
20 mins: Kane-a'n hlauhawm takin Andy Robertson a tlawh a, yellow card pek ni mah se red card zawk tur niin a lang.
35 mins: Diogo Jota chuan Liverpool si phurh a sut.
37 mins: Penalty box chhungah Emerson Royal chu Jota lakah a foul a, penalty beisei mah se referee-in a pe lo.
39 mins: Khelmual sir lamah Klopp a ṭang ulh a, referee-in yellow card a pe.
53 mins: Spurs player Harry Winks lakah Joel Matip a foul a, penalty area hmawr ni mah se referee-in penalty a pe lo.
69 mins: Andy Robertson-a'n Liverpool hma a hruaipui a, goal luhna kawngah ball-in Mohamed Salah-a ban fuh mah se referee-in goal a pawmsak.
74 mins: Spurs tan Son Heung-min-a'n si phurh a sut.
77 mins: Robertson-a'n Emerson chu hlauhawm takin a dai khalh a, referee-in yellow card pe zet mah se VAR a rawn hnuah a thutlukna a sut a, Scottish defender hi a hnawt chhuak.