Min huat chhan ka hre lo - Klopp
Liverpool boss Jurgen Klopp-a'n a beisei angin referee-in thutlukna a siam lo a, German coach chuan an inkhel enkawltu Paul Tierney chuan a chungah lungawi lohna a nei ang hialah a ngai!
Klopp chuan, "Ka lakah hian eng buaina nge a neih ka hre lo. Thutlukna dik lo hulhual pahnih leh tih dik pakhat a nei a, chung zawng zawng chu kan tana ṭha lo thutlukna vek a ni," a ti.
Jota penalty hlawhchhuah loh chungchang sawiin Klopp chuan, "Tierney-a'n min hrilh danin Jota hnena penalty a pek loh chhan chu Jota khan penalty hmuh beiseiin a ding khawmuang niin a sawi a, mahse, player-in shot neih a tumte chuan a din zawk a ngai a ni lawm ni?Khelmual chhunga a rem lai berah ding chungin penalty a pe lo a, a mak a ni," a ti a, a lawm lo hle.
Referee-in yellow card a pek chungchang pawh sawiin Klopp chuan, "Ka chunga lungawi lohna a neih chu in zawh a ngai ang. Game-ah ka rilru leh ngaihtuahna ka seng nasa deuh hlek a, mahse, referee-in min chhanletna chu yellow card a ni.
"Yellow card ai chuan thutlukna dik ka duh zawk," a ti a, a lungawi thei lo. Klopp chuan, "Kane kha 100% a red card hmu tur a ni a, engtianga hnawt chhuak lo nge an nih kha chu Tierney leh VAR duty ka zawt duh. Second half-ah khan Harry kha khelmualah a awm tur a ni tawh lo.
"Kane-a tlawh dan kha en ula, Andy ke kha a tliak thei hial ang chu. Red card a ni tih kan pawm vek a, mahse, referee chuan kan hmuh angin a hmu ve lo," a ti.
Robertson red card chungchang pawh Klopp chuan sawiin, "Robbo hi player thuawih tak a ni a, mahse, a talbuai ve palh a ni. Red card hmuh theihna a ni a, mahse, referee khan VAR a rawn ngei leh rawn ngei loh ka hre lo - a chhan chu a hmaa thutlukna siam pahnihah khan office-ah VAR duty a ṭhu lo emaw kan ti a ni," a ti deuh kher!
Spurs boss Antonio Conte chuan, "Ka staff-te chuan Liverpool goal hnihna kha pawm loh tur a nih thu min hrilh a, mahse, Jurgen hian hemi chungchang hi a sawi ve duh kher ang em, ka hre lo.
"Salah kha chiang takin a handball a, mahse, referee khan mak takin a kaltlang tir a ni. Referee thutlukna inkhelh zawha sawi chiam pawh hi a ṭul hranin ka hre lo a, tumahin kan hlawkpui lo," a ti.
Klopp-a'n Kane chu hnawhchhuah ngei ngei turah a ngai a, English striker hian yellow card a hmu pawh chu mak a tih thu a sawi thung! Kane chuan, "Ka ngaihdanah chuan tackle ṭha ve tak a ni.
"Ka tlawh lai kha muang taka ennawn chuan a dik lo angin a lang mai thei a, mahse, hetiang anga thutlukna dik siam a nih theih nan VAR kan nei reng a ni. Game level sangah chuan tackle hlauhawm tak anga lang pawh awm fo tur a ni a, yellow card ka hmu pawh kha mak ka ti zawk," tiin a sawi.