Emma Raducanu tan chawimawina

BBC Sports Personality of the Year 2021 atan US Open champion Emma Raducanu thlan a ni. Andy Murray (2016) hnuah tennis player zinga he chawimawina dawng leh thei hmasa ber a ni.

Kum 18 mi Raducanu hian khawvel barkhaihin US Open nomawi a chawi a nih kha. British hmeichhe zingah kum 44 hnua major title la leh thei hmasa ber a ni a, a sulhnu ropui vang hian chawimawina dawn hi a phu.

Raducanu hi Covid-19 a kai avangin khung hran mek a ni a, award semnaah hian a hmunah a kal thei lo. A awm mekna Abu Dhabi aṭangin video kaltlangin a inlan a, chawimawina dawng tur hian diver Tom Daley leh swimmer Adam Peaty te a khum.

World number 19 Raducanu chuan, "Award dawng thei tura chhawp chhuah ka ni ve pawh kha a ropui ka ti a, thlan bik ka ni leh zel phei chu ka tan a ropui lutuk. Sports Personality of the Year hi ka naupan lai aṭangin ka en ṭhin, tunah chuan a dawngtu ka ni ve ta.

"Min vote tu zawng zawng chungah lawmthu ka sawi, ka tan chuan kum duhawm leh ṭha ber a ni hial ang. Season tharah minṭantute hmaa Wimbledon khelh hlan ka nghakhlel tawh hle," a ti.