Srikanth tan silver medal

World Badminton Championships khelh zawh takah Kidambi Srikanth chu final-ah a chak lo. Chak lo zawk ni mah se silver medal a hlawh chhuak tho a, a thlen chin hi India mipa tan chuan a la sang ber.

Pathianni zana final inkhelah Srikanth hi Singapore tlangval Loh Kean lakah 15-21, 20-22 in a chak lo, minute 43 an inkhelh chhungin India tlangval hi a che fuh hleithei lo zawk a ni.

Indian mipa player zingah Prakash Padukone (bronze, 1983), B Sai Praneeth (bronze, 2019) leh Lakshya Sen (bronze, 2021) ten Badminton World Championship-ah hian medal an lo la ve tawh bawk.

Hmeichhe lamah chuan 2019 khan PV Sindhu a lo champion tawh. Olympic medal pahnih dawng tawh Sindhu hi tun ṭumah pawh khel ṭha leh viau mah se quarterfinal-ah Tai Tzu Ying a ngam lo.